хитай билән сәуди әрәбистан 34 мәбләғ селиш келишими имзалиди

сәуди әрәбистан билән хитай ширкәтлири оттурисида һәр қайси саһәләр бойичә  34 мәбләғ селиш келишими имзаланди.

1916488
хитай билән сәуди әрәбистан 34 мәбләғ селиш келишими имзалиди
Şi Cinping.jpg

түркийә авази радийоси хәвири: сәуди әрәбистан рәсмий хәвәр агентлиқи «SPA» ниң хәвиригә асасланғанда, хитай дөләт рәиси ши җинпиңниң сәуди әрәбистандики зийарити даирисидә түзүлгән мәбләғ селиш келишимлири сәуди әрәбистан селинма министири халид бин абдуләзиз әл фалиһ вә саһәләргә алақидар дөләт органлириниң вәкиллири қатнашқан бир йиғинда имзаланған.

икки тәрәп оттурисидики келишимләрниң йешил енергийә, йешил һидроген, қуйаш енергийәси, учур техникиси, булут мулазимити, қатнаш, тиранспорт, медитсина, санаәт, туралғу вә қурулуш завутлири қатарлиқ һәр қайси саһәләрни өз ичигә алидиғанлиқи билдүрүлди.

сәуди әрәбистан селинма министири фалиһ имза қойуш мурасимида сөз қилип, мәзкур келишимләрниң сәуди әрәбистанниң хитай билән болған иқтисад вә селинма қатарлиқ һәр қайси саһәләрдики мунасивәтлирини тәрәққий қилдуруш арзусиниң ипадиси икәнликини ейтти.  

хитай дөләт рәиси ши җинпиңниң зийаритиниң икки дөләт рәһбәрлири оттурисида иқтисад вә селинмини өз ичигә алған һәр саһәдики икки дөләт мунасивәтлири шундақла шериклик мунасивәтлирини тәрәққий қилдуруш вә күчәйтиш ирадисини әкис әттүридиғанлиқини байан қилған фалиһ: «бу зийарәт, иқтисадий вә сода мунасивәтлири билән мәбләғ селиш қәдимини тизлитишкә төһпә қошиду» деди.

хитай ташқи ишлар министирлиқи 7 - декабирдин 9 - декабирғичә (2022) ши җинпиңниң сәуди әрәбистанда рәсмий зийарәттә болғанлиқини, пайтәхт рийадта өткүзүлидиған хитай-әрәб дөләтлири башлиқлар йиғини вә хитай-парс қолтуқи дөләтлири һәмкарлиқ тәшкилати башлиқлар йиғиниға қатнишидиғанлиқини елан қилған иди.



مۇناسىۋەتلىك خەۋەرلەر