русийә пирезидент байдинниң сөһбәтлишиш тәклипигә инкас қайтурди

түркийә авази радийоси хәвири: русийә кремил сарийи байанатчиси дмитрий песков мухбирларниң зийаритини қобул қилип, пирезидент байдинниң путин билән көрүшүш үчүн русийәниң украинадин әскәрлирини чекиндүрүши керәклики тоғрисидики сөзлирини хатириләтти.

у русийә армийәсиниң украинадин чекинишкә тәййар әмәсликини әскәртип: «алаһидә һәрбий һәрикәт давамлишиватиду. путин һәр қачан учришиш вә музакирәләргә очуқ иди, һазирму шундақ. тинчлиқ асасидики дипломатик васитиләр мәнпәәтлиримизни қолға кәлтүрүшниң әң көп талланған йоли» деди.

у «американиң русийәниң йеңи земинлирини (украинаниң бесивалған земинлирини) һазирғичә етирап қилмиғанлиқи» ни, буниң өзара музакирәгә асас тепишни қийинлаштурғанлиқини билдүрүп, путинниң дөләт мәнпәәти үчүн һәр қачан музакирәләргә очуқ икәнликини қәйт қилди.

 у путинниң украинада уруш башлиништин илгириму америка, нато, йавропа хәвпсизлик вә һәмкарлиқ тәшкилати билән тәййарланған текист лайиһәси асасида сөһбәт башлашқа тиришқанлиқини, әмма бу тиришчанлиқниң җавабқа еришәлмигәнликини хатириләтти.

у түркийә җумһур рәиси рәҗәп таййип әрдоған билән сүрийәдики бәшшар әсәд һакимийитиниң көрүшүш еһтимали тоғрисидики соалға: «һазирчә ениқ әмәс, әмма мушундақ еһтималлиқ бар. путин бундақ учришишни қизғин қарши алиду вә русийә буниңға күч чиқиришқа тәййар» дәп җаваб бәрди.