ürümchidiki namayishlar pütün xitay miqyasigha kéngeymekte

türkiye awazi radiyosi xewiri: tünügün (27-noyabir) kechte paytext béyjingda ötküzülgen namayishta, namayishchilar hökümetning ot kétish weqesige tutqan pozitsiyesige naraziliq bildürdi.

béyjingning ottura qismidiki chawyang rayonida kéchide lyamaw qanilining ikki teripige toplanghan bir qanche yüz kishilik guruppa, ürümchidiki ot apitide jénidin ayrilghanlarni xatirilidi.

derya boyigha sham yéqip, gül qaldurghan namayishchilar qolliridiki namayishlarning simwoligha aylanghan quruq aq qeghezlerni kötürüshüp, «karantinni xalimaymiz», «sinaq qilinishni xalimaymiz» dégen shoarlarni towlidi.

xitayda az uchraydighan bu namayish eslide xitay xelqining hökümetning wuxen wirusi siyasiti we yuqumni kontrol qilish tedbirlirige bolghan ghezep- nepritining künséri küchiyiwatqanliqining ipadiisi, dep qaralmaqta.

24 – noyabir (2022) ürümchi shehirining tengritagh rayonidiki birturalghu binasida yüz bergen ot apitide, 10 kishi qaza qilghan we dairiler bir öyning tokidin kashila chiqip  ot ketkenlikini ilgiri sürgen idi.

ot apiti yüz bergen turalghu binasidiki ahalilerning karantin sewebidin öyliridin sirtqa chiqalmighanliqi, ot öchürush etritiningmu métal tosuqlar bilen qorshalghan binagha kirelmigenliki, hemde otni waqtida öchürelmigenliki qattiq naraziliq qozghighan idi.