شولز: ئۇكرائىنا ئۇرۇشىغا پۇتىن جاۋابكار

تۈركىيە ئاۋازى رادىيوسى خەۋىرى: گېرمانىيە باش مىنىستىرى ئولاف شولز فوكس (Focus) ژۇرنىلىغا بايانات بېرىپ: «ئۇرۇش ياۋروپاغا قايتىپ كەلدى. قوشنىسى ئۇكرائىنادىن زېمىن بۆلۈۋالماقچى بولغان رۇسىيە ھۆكۈمىتىنىڭ خەلقئارا قانۇننى رەھىمسىزلەرچە دەپسەندە قىلىشى كىشىنى قايغۇغا سالىدۇ» دېدى.

ئۇ ياۋروپادا ھەر قايسى دۆلەتلەرنىڭ بىر-بىرى بىلەن شىددەتلىك ئۇرۇش قىلغان مەزگىلىدە قىلغانغا ئوخشاش، رۇسىيەنىڭ زېمىنىنى زوراۋانلىق بىلەن كېڭەيتىشكە ئۇرۇنۇۋاتقانلىقىنى تەكىتلەپ، ئىمپېرىيالىزمنىڭ ياۋروپاغا قايتىپ كەلگەنلىكىنى بىلدۈردى.

ئۇ ئۇكرائىنا ئۇرۇشىنىڭ موسكۋانىڭ پىلانىدىن زور دەرىجىدە پەرقلىق بولغانلىقىنى ئەسكەرتىپ: «مەلۇم نۇقتىدىن ئېيتقاندا، رۇسىيەنىڭمۇ بۇ ۋەھىمىلىك ۋەزىيەتتىن قۇتۇلۇش يولى ئىزدەيدىغان ۋاقتى كېلىشى كېرەك. ھەربىي قىسىملارنىڭ چېكىنىشى ھەل قىلغۇچ ئەھمىيەتكە ئىگە» دېدى.

ئۇ ئۇكرائىنادىكى ئۇرۇشنىڭ بارلىق خەلقئارالىق قانۇنلارنى دەپسەندە قىلغانلىقىنى تەكىتلەپ: «بۇ ئۇرۇشقا رۇسىيە پىرېزىدېنتى ۋلادىمىر پۇتىن جاۋابكار. ئۇكرائىنادا كىشىنىڭ ئىشەنگىسى كەلمەيدىغان دەرىجىدە ئۇرۇش جىنايەتلىرى ئۆتكۈزۈلدى. بىز جىنايەتلەرنىڭ تەكشۈرۈلۈشىگە، جاۋابكارلارنىڭ تېپىلىشىغا ۋە ئۇلارنىڭ جازاغا تارتىلىشىنىڭ كاپالەتكە ئىگە قىلىنىشىغا ياردەم قىلىمىز» دېدى.