биразилийәдә икки мәктәпкә қилинған қораллиқ һуҗумда қаза қилғанларниң сани 4 кә өрлиди

биразилийәдә җүмә күни 16 йашлиқ бир һуҗумчиниң икки мәктәпкә қилған һуҗумида, йариланған бир кишиниң қаза қилиши сәвәбидин қаза қилғанларниң омумий сани 4 кә өрлиди.

1911479
биразилийәдә икки мәктәпкә қилинған қораллиқ һуҗумда қаза қилғанларниң сани 4 кә өрлиди

түркийә авази радийоси хәвири: биразилийәниң рәсмий хәвәр агентлиқи «агенсийа брасил» ниң хәвиригә асасланғанда, биразилийәниң еспирито санто өлкисидә тунҗи һуҗум йүз бәргән пиримо битти мәктипидә 38 йашлиқ оқутқучи флавийа амбос мерчон дохтурханида давалаш җарйанида қаза қилған. шундақ қилип, икки мәктәпкә қилинған һуҗумда 3 оқутқучи вә 1 оқуғучи болуп, җәмий қаза қилғанларниң сани 4 кә көпәйгән.

дохтурханида давалиниватқан 5 кишидин 4 нәпириниң әһвали еғир икәнлики, улардин иккисиниң 11 вә 14 йашлардики өсмүр икәнлики билдүрүлди.

җүмә күни биразилийәниң шәрқидики еспирито санто өлкисигә қарашлиқ аракруз шәһириниң кокейрал мәһәллисигә җайлашқан икки мәктәпкә бир киши қораллиқ һуҗум қилған иди.

һәрбий форма кейип, йүзигә маска тақивалған һуҗумчи башланғуч вә оттура мәктәп сәвийәсидә маарип билән шуғуллинидиған пиримо битти мәктипигә бесип кирип уққа тутқандин кейин, йәнә шу кочидики башқа бир мәктәпкиму қораллиқ һуҗум қилған иди.

даириләр кимлики билдүрүлмигән һуҗум қилғучиниң 16 йашлиқ өсмүр икәнликини, һуҗумни 2 йил пиланлиғанлиқини вә натсист бәлгилик биләйзүк тақивалғанлиқини билдүрди.

еспирито санто өлкиси валийси ренато касагранде һуҗум сәвәбидин өлкидә 3 күнлүк матәм елан қилинғанлиқини җакарлиди.



مۇناسىۋەتلىك خەۋەرلەر