amérika - rusiye istixbarat emeldarliri paytext enqerede söhbet ötküzdi

türkiye awazi radiyosi xewiri: türkiye istixbarat menbeliri amérika merkizi istixbarat idarisi diréktori bil burns bilen rusiye tashqi istixbarat idarisi diréktori sérgéy nariskinning türkiye milliy istixbarat idarisi (MIT) ning sahibxanliqida paytext enqerede uchrishish ötküzgenlikini uqturdi.

türkiye jumhuriyiti jumhur reislik mehkimisi uchur – alaqe ishliri idarisi diréktori fahrettin altun birleshme agéntliqigha mezkur uchrishishni jezmleshtürüp: «bu uchrishish türkiye we jumhur reis rejep tayyip erdoghanning dunya tinchliqigha qoshqan muhim töhpilirige yene birini ilawe qildi» dédi.

yighinda, yadro qorallirini ishlitishni öz ichige alghan dunyaning bixeterlikige tehdit salidighan mesililerning muzakire qilinghanliqini bildürgen altun: «buningdin ilgiri ukraina we rusiye tashqi ishlar ministirlirini uchrashturup, ashliq kélishimining tüzülüshini muresse qilghan türkiye, herqaysi terepler bilen tinchliq ornitish yolida söhbet ötküzüshni dawamlashturidu, bu musapide rol oynashtin özini qachurmaydu» dégenlerni qeyt qildi.

rusiye pirézidéntliq mehkimisi — krémil bayanatchisi dimitriy péskowmu, merkizi istixbarat idarisi  bilen rusiye tashqi istixbarat idarisi mesullirining enqerediki uchrishishining, amérikaning telipige asasen emelge ashurulghanliqini uqturdi.

péskow rusiye xewer agéntliqlirigha bergen bayanatida, uchrishishning mezmunigha munasiwetlik uchurlarni ortaqlashmaydighanliqigha isharet qilip: «mushundaq bir uchrishish heqiqeten ötküzüldi. söhbet amérika terepning teshebbusigha asasen ötküzüldi» dédi.

aqsaray dölet bixeterlik kéngishining ismini ashkarilashni xalimighan bir emeldarimu, rusiye bilen bolghan, bolupmu yadro xewpi we istratégiyelik muqimliqqa munasiwetlik xewplerni bashqurushqa munasiwetlik alaqe qanallirining ochuq ikenlikini eskertti.