lawrow: gherb elliri xitay we rusiyening menpeetlirini kontrolluqi astigha élishni xalaydu

türkiye awazi radiyosi xewiri: rusiye tashqi ishlar ministiri sérgéy lawrow kambodzhaning sahibxanliqida ötküzülgen 2022 – yilliq sherqiy jenubiy asiya elliri ittipaqi bashliqlar yighinigha qatnishish üchün  paytext fnom péngha yétip barghan bolup, bu dairide metbuatlargha bayanat berdi.

u amérika we natoning asiya-tinch okyan rayonining kontrolluqini alqinigha kirgüzüwalmaqchi ikenlikini ilgiri sürüp: «hazir rayonda sighdurushchan bir qurulma bar, emma amérika bilen nato bu rayonning kontrolluqini alqinigha kirgüzüwalmaqchi boluwatidu» dédi.

u amérikaning ukraina weziyitige dair «qobul qilghili bolmaydighan» bayanatliri sewebidin sherqiy jenubiy asiya elliri ittipaqi bashliqlar yighinida ortaq bir qarar chiqarghili bolmighanliqini tekitlep,  kambodzha  teripidin téximu bek hemkarliishish toghrisida bir bayanat élan qilidighanliqini éytti.

u gherbning rayonni herbiyleshtürüsh arqiliq xitay we rusiyening menpeetlirini kontrolluqi astigha élishni xalaydighanliqini we buning eng chong alamitining bolsa, awstraliye, amérika we engliye otturisidiki «AUKUS» bixeterlik shertnamisi ikenlikini tilgha aldi.

u «AUKUS» bixeterlik shertnamisigha yéngi zélandiye, kanada we yaponiyenimu kirgüzüshke tirishchanliq körsitilgenliki terepke hemmining diqqitini tartti.  

amérika, engliye we awstiraliye rehberliri 2021 - yili  16 - séntebirde «AUKUS» bixeterlik shertnamisi bilen yadro énérgiyelik su asti paraxoti téxnikisini awstiraliyege yötkeydighanliqini élan qilghan idi.

bayanatta, gerche xitayning ismi tilgha élinmighan bolsimu, «üch dölet (awstraliye, amérika we engliye) kunséri küchiyiwatqan rayon xaraktérlik bixeterlik endishelirige ortaq ehmiyet bériwatidu, shundaqla bu hemkarliq shertnamisi xitayning rayondiki herbiy küchini tengpunglashturushni meqset qilidu» dégen qarashlar otturigha chiqishqa bashlighan idi.

xitay bolsa, «AUKUS» bixeterlik shertnamisigha naraziliq bildürüp, bu ittipaqning rayonning tinchliqi we muqimliqigha shundaqla xelqaraning yadro qorallarning kéngiyishini cheklesh tirishchanliqigha ziyan yetküzidighanliqini ilgiri sürgen idi.