eliyéw: dunya elliri firansiyening aljiriyede sadir qilghan qirghinchiliqini untumasliqi kérek

türkiye awazi radiyosi xewiri: ezerbeyjan pirézidénti ilham eliyéw aljiriyening sahibxanliqida chaqirilghan 31-nöwetlik ereb elliri ittipaqi bashliqlar yighinida  ittipaq tüzmeslik herikitining nöwettiki bashliqi bolush süpiti bilen söz qilip, aljiriyening 1954-yili 11-ayning 1-küni bashlanghan musteqilliq kürishining 68 – xatire yilini tebriklidi.

firansiye mustemlikisi dewride hayatidin ayrilghan aljiriyeliklerni xatirilesh üchün yasalghan shéhitler abidisi we aljiriye döletlik mujahidlar muzéyini ziyaret qilghanliqini bildürgen eliyéw: «shéhitler abidisi we mujahidlar muzéyini ziyaret qildim. firansiyening aljiriye xelqige qilghan qirghinchiliqi méni bek tesirlendürdi. dunya firansiyening aljiriyediki bu qirghinchiliqini hergiz untup qalmasliqi kérek» dédi.

u, firansiyening aljiriyeni 130 yildin köprek ishghal qilip, bir yérim milyondin artuq ademning ölüshini keltürüp chiqarghanliqini tekitlep, aljiriye xelqining firansiye mustemlikichilikige qarshi namayan qilghan qehrimanliqining insaniyetning éside büyük bir xatire bolushni dawamlashturidighanliqini otturigha qoydi.

aljiriyening sahibxanliqida tünügün bashlanghan bashliqlar yighinigha misir pirézidénti abdulfettah sisi, qatar emiri temim bin hemed al sani qatarliq 16 rehber qatnashmaqta.

yighingha yene ittipaq tüzmeslik herikitining nöwettiki reisi süpiti bilen ezerbeyjan pirézidénti ilham eliyéw, afriqa elliri ittipaqining nöwetchi reisi süpiti bilen sénégal pirézidénti maki sal, birleshken döletler teshkilati (b d t) bash katipi antonio gutérrés we ht bash katipi hüseyin ibrahim taha qatarliq rehberlermu méhman süpitide qatnashmaqta.

tünügün bashlanghan, bügün rehberler qatlimining ishtirak qilishi bilen dawamlishidighan ereb elliri ittipaqi bashliqlar yighinining pelestin mesilisini qollash, yémeklik bixeterliki, térrorluqqa qarshi turush we rayon mesilisige munasiwetlik muhim qararlarni chiqirishi texmin qilinmaqta.