putin, eliyéw we pashinyan üch terep uchrishishi ötküzdi

türkiye awazi radiyosi xewiri: rusiye pirézidénti wiladimir putin, ezerbeyjan pirézidénti ilham eliyéw we erméniye bash ministiri nikol pashinyan sochida körüshüp, ezerbeyjan bilen erméniye otturisidiki tinchliq kélishimining asasini teshkil qilidighan höjjetke imza qoyush mesilisini muzakire qildi.

putin, uchrishishning nahayiti ünümlük bolghanliqini, uning kelgüsi kélishimler üchün paydiliq muhit yaritip bergenlikini tilgha alghandin kéyin, «rastini éytqanda, biz hemmini maqullimiduq, mutexessisler teripidin otturigha qoyulghan deslepki layihediki bezi nersilerni chiqiriwétishimizgha toghra keldi. shundaqtimu, bu qedem weziyetni omumiy jehettin hel qilishni meqset qilghan yéngi heriketlerge sharait yaritip béridu» dédi.

üch terep uchrishishidin kéyin élan qilinghan birleshme bayanatta, «rayonning sijil we uzun muddetlik tinchliqigha kapaletlik qilish üchün, ezerbeyjan bilen erméniye otturisida tinchliq kélishimi imzalashqa aktip teyyarliq qilishning muhimliqi»ning tekitlep ötülgenliki, özara qobul qilinidighan hel qilish chariliri üstide dawamliq izdinish toghrisida birdeklik hasil qilinghanliqi otturigha qoyuldi.

bayanatta, eliyéw bilen pashinyanning, rusiyening jenubiy kawkaz rayonining muqimliqi we güllinishige shundaqla munasiwetlerning normallishishigha töhpe qoshushqa teyyar ikenlikidin memnun bolghanliqi qeyt qilindi.

rehberlerning sochidiki uchrishishigha parallél halda rusiye, ezerbeyjan we erméniye tashqi ishlar ministirliri sérgéy lawrow, jeyhun bayramow we ararat mizoyanmu üch terep yighini achti.