rusiye ashliq toshush kélishimni tonglatti

türkiye awazi radiyosi xewiri: rusiye dölet mudapie ministirliqining bayanatida, tünügün kiyéw dairilirining engiliye mutexessislirining ishtirak qilishi bilen qara déngiz paraxot filotigha we ashliq karidorining bixeterlikini qoghdashqa qatnashqan puqrawiy paraxotlargha qarshi térrorluq herikiti élip barghanliqini ilgiri sürdi.  

bayanatta, «térrorluq herikitini nezerde tutup, rusiye terep ukraina portidin déhqanchiliq mehsulatlirining chiqishigha alaqidar kélishimni ijra qilishqa qatnishishini waqtinche tonglatti» déyildi.

rusiye dölet mudapie ministirliqi tünügün qanunsiz qoshuwélinghan qirimgha tewe séwastopol shehiride ukrainaning rusiye urush paraxotliri we puqrawi paraxotlirigha hujum qilghanliqini bildürgen idi.

bayanatta, hujumda köp sanda uchquchisiz ayropilan ishlitilgenliki we ularning hemmisi yoq qilinghanliqi bildürülüp, hujumgha uchrighan qara déngiz déngiz armiyesi paraxotlirining qurulghan ashliq karidorning bixeterlikige kapaletlik qilish musapisige qatnashqan paraxotlar ikenliki uqturulghan idi.  

rusiye tashqi ishlar ministirliqimu ashliq mehsulatlirining ukrainadin chiqishigha alaqidar kélishimni muddetsiz tonglatqanliqini jakarlap, rusiye terepning buningdin kéyin karidordin ötidighan puqrawiy paraxotlarning bixeterlikige kapaletlik qilalmaydighanliqini élan qildi.

rusiye tashqi ishlar ministirliqi teripidin élan qilinghan yazma bayanatta, tünügün qara déngiz teshebbusining  bir qismi shundaqla ukraina déhqanchiliq mehsulatlirini éksport qilish iltimasining bir parchisi süpitide qurulghan insanperwerlik karidorini suy éstimal qilghan ukraina qoralliq qisimlirining séwastopoldiki déngiz armiye bazisida turushluq rusiye qara déngiz filoti paraxotlirigha we ul eslihelirige uchquchisiz ayropilan bilen keng kölemlik hawa we déngiz hujumi qilghanliqi eskertildi.

bayanatta, engiliye mutexessisliri teripidin bashquruliwatqan ukraina qoralliq qisimliriniing mezkur karidorining xizmitige kapaletlik qiliwatqan rusiye paraxotlirigha qarshi «térrorluq herikiti» élip barghanliqi munasiwiti bilen bu qararni maqullighanliqi tekitlinip, «rusiye terep qara déngiz teshebbusigha qatnashqan puqrawiy quruq yük paraxotlirining bixeterlikige kapaletlik qilalmaywatidu, bügündin bashlap kélishimning ijra qilinishini muddetsiz tonglitidu» déyildi.

bayanatta yene, istanbulda ukraina ashliqining toshulushini kontrol qilidighan birleshme maslashturush merkizidiki rusiye wekillirige zörür bolghan yolyoruqlarning yollanghanliqi uqturuldi.