néd prays: rusiyening ukrainada yadro qorali ishlitishi éghir aqiwetlerni keltürüp chiqiridu

türkiye awazi radiyosi xewiri: amérika tashqi ishlar ministirliqi bayanatchisi néd prays kündilik muxbirlarni kütüwélish yighinida söz qilip: « (rusiye pirézidéntliq mehkimisi) kirémildin tarqalghan bu xil natoghriliqi ochuq-ashkara uchurlarni anglighanliqimizdin endishe qilmaqtimiz. biz kirémilning bu xil uchur qalaymiqanchiliqigha alaqidar ötmüshini bilimiz» dédi.

u, ukraina tashqi ishlar ministiri dimtro kulébaning xelqara atom énérgiyesi orgini (IAEA)  dréktori rafail grossi bilen körüshüp, dölitidiki eslihelerni tekshürüshke chaqirghanliqini eskertip, amérika tashqi ishlar ministiri antoniy blinkénningmu bügün grossi bilen bu mesile toghrisida körüshidighanliqini, bu mesilining küntertipliride ikenlikini bildürdi.

néd prays, ruslargha körsitidighan her bir bahanilirining sürkilishni kücheytiwétidighan tuqulmilardin ibaret bolidighanliqini éniq otturigha qoyghanliqlirini, rusiyening ukrainada yadro qorali ishlitidighanliqigha dair birer alamet we amérikaning yadro qorali orunlashturush pilanini özgertishini teqezza qilidighan herqandaq bir sewebning yoqluqini tilgha élip: «rusiyening yadro qorallirini ishlitishi éghir aqiwetlerni keltürüp chiqiridu» dédi.

bayanatchi prays, bu éghir aqiwetning qandaq bolidighanliqi toghrisidiki soalgha jawab bérip, rusiyeni téximu éniq we téximu keskin ibarilerni ishlitip agahlandurghanliqlirini, emma tashlinidighan qedemler toghrisidiki uchurlarni jamaetchilik bilen ortaqlishishni xalimaydighanliqlirini bildürdi.

rusiye dölet mudapie ministiri sérgéy shoygu tünügün amérika, firansiye we engliye, shundaqla türkiyediki mensepdashliri bilen téléfonliship, ukrainaning «meynet bomba» ishlitishke teyyarliq qiliwatqanliqini éytqanidi.

amérika, engliye we firansiye tashqi ishlar ministirliri söhbettin kéyin birleshme bayanat élan qilip, rusiyening dewalirini ret qilip, jiddiychilikni ashurush üchün ishlitilgen bahanilerni qobul qilmaydighanliqlirini jakarlighanidi.