zélénskiy dunyaning rusiyege qattiq inkas qayturushi kéreklikini éytti

türkiye awazi radyosi xewiri: zélénskiy rusiye-ukraina urushining 242 - künide télégramma hésabidin sinliq uchur hembehirlep, urushqa alaqidar eng yéngi özgirishlerdin melumat berdi.

zélénskiy rusiyening ukrainadiki xelqni yoqitishqa urunuwatqanliqini tekitlep, «rusiye ölüm we buzghunchiliq élip kelgen hemmila yerde, biz qaytidin normal turmushqa ötüwatimiz. bu pütünley ukrainaliqlargha munasiwetlik bir ish. ukraina bolghan yerde, turmush hergiz toxtap qalmaydu. emma rusiye negila barmisun, arqisida kolliktip mazarliqlar, qiynash lagérliri, weyran qilinghan sheherler we yézilarni shundaqla mina kömülgen zémin, nabut qilinghan ul - esliheler we tebiiy apetlerni qaldurup mangmaqta» dédi.

zélénskiy rusiye dölet mudapie ministiri sérgéy shoyguning tünügün bir qisim döletlerning mudapie ministirliri bilen téléfonda körüshkenlikini we yadro tehditi mesilisini muzakire qilghanliqini bildürdi.

zélénskiy bügünki künde héchkimning rusiyege ishenmeydighanliqini tilgha élip, «zaporijya yadro istansisidiki radiatsiye apiti heqqide tehdit salghan rusiye idi. bu rusiye bashqurulidighan bombilirining ukrainaning yadro esliheliri üstidiki orbitidur» dédi.

zélénskiy rusiye qisimlirini «kontirolluqidiki xérson rayonigha jaylashqan kaxowa tosmisigha mina orunlashturmaqta we ukrainada cheklengen qorallarni ishletmekte» dep eyiblidi hemde «emdilikte dunyaning (rusiyege) imkanqeder qattiq inkas qayturushi kéreklikige ishinimen» dédi.

rusiyening bügünki künde peqet ukrainaghila emes, belki pütün dunyagha yadro tehditi sélishni dawamlashturiwatqanliqini eskertken zélénéskiy, dunyadiki döletlerning buninggha qarita émbargo qatarliq her xil usullar bilen qattiq inkas qayturushi kéreklikini tekitlep, «chünki ular bizni qanche küchlük qollisa, bu urush we éhtimalliqi bolghan rusiye tehditi shunche téz yoqilidu» dédi.