iran zengezurgha yéqin jaygha konsulxana achti

türkiye awazi radiyosi xewiri: erméniyening jenubigha jaylashqan kapan shehiri, ezerbeyjanni nahchiwangha tutashturidighan zengezur karidorining pilanlanghan liniyesige yéqin yerde bolup, irangha chégradash kélidu.

gerche zengezur bir chaghlarda musulman türkler yashaydighan tarixiy ezerbeyjan zémini bolsimu, 1920-yillarda sowét ittipaqi teripidin erméniyege qoshuwétilgen bolup, hazirghiche erméniye chégrasi ichide turushni dawamlashturmaqta. zengezurning erméniyege bériwétilishidin kéyin, ezerbeyjan naxchiwan bilen bolghan quruqluq alaqisini yoqitip qoydi.

nahchiwan bilen ezerbeyjanning gherbiy qisimlirining biwasite quruqluq chégrasining bolmasliqi, baku hökümitige izchil qiyinchiliq élip keldi. ezerbeyjanning erméniye ishghaliyiti astidiki taghliq qarabagh rayoni azad qilinghan 2020 - yilidiki 44 künlük urushtin kéyin imzalanghan urush toxtitish kélishimining 9-maddisi, rayonda qurulidighan qatnash karidori bilen munasiwetlik boldi.

erméniye bolsa, her xil bahane – seweblerni ilgiri sürüp, zengezur karidori kélishimini yolgha qoyushtin özini tartip kelmekte. téhran hökümiti bu jehette erminiyeni qollimaqta.

ezerbeyjan bolsa, awiyatsiye we tömür yol qatnishi yolgha qoyulidighan zengezur karidori kélishimini ijra qilish üchün öz zéminidiki qurulushlarni dawamlashturmaqta.