gérmaniye mudapie minisitiri ukrainada ziyarette boldi

türkiye awazi radiyosi xewiri: gérmaniye dölet mudapie ministirliqi twittérdiki adrésida bayanat élan qilip, lambréychtning tünügün ukrainagha bérip mensepdishi oléksiy réznikof bilen körüshkenliki bildürdi.

gérmaniye xewer agéntliqining xewirige qarighanda, lambréycht odéssada bayanat bérip, gérmaniyening bir qanche ay ilgiri teminleshke wede bergen «IRIS-T» tipliq hawa mudapie sistémisining aldimizdiki künlerde ukrainagha yetküzülidighanliqini éytqan.

gérmaniye teminligen «gépard» tipliq ayropilangha qarshi tankilarnimu közdin kechürgen lambréycht, bu tankilarning muhim ul eslihelerni qoghdash we rusiyening hawa hujumliridin mudapielinishke yardem béridighanliqini bildürgen.

u, girétsiye bilen silowakiyeningmu ukrainaning rusiyege qarshi turush kürishige yardem bérish üchün tankilarni ewetidighanliqini eskertip: «gérmaniyemu girétsiye bilen slowakiyediki boshluqlarni toldurushqa yardem qiliwatidu» dégen.

lambréycht, ukrainaning nurghun hawa hujumigha uchrighanliqini, shunga hawa mudapiesige téximu köp yardem bérishning muhimliqini tekitligen.

u, ukrainaning shimaliy atlantik ehdi teshkilati — natogha tézdin qobul qilinish iltimasini toghra chüshinidighanliqini, emma buning üchün choqum bezi shertlerning hazirlinishi kéreklikini otturigha qoyghan.

u yene, natoning urushta terep bolmaydighanliqi toghrisidiki meydanini otturigha qoyushining muhimliqini tekitilep: «ixtilapning béshida buni éniq otturigha qoydu we biz buningdin waz kechmeymiz» dégenlerni qeyt qilghan.