xelqara jemiyet rusiyening ukrainaning töt rayonini igiliwélishigha naraziliq bildürmekte

türkiye awazi radiyosi xewiri: shimaliy atlantik ehdi teshkilati — nato bash katipi yéns stolténbérg, eza döletlerning rusiyening töt rayonni özige qoshuwélish qararini étirap qilmaydighanliqini bildürdi.

amérika qoshma ishtatliri rusiyening qoshuwélish qararini eyiblep, rusiye merkizi bankisi bashliqi élwira nabiullina qatarliq yüzligen shexs we organgha jaza yürgüzüshni qarar qildi.

amérika pirézidénti jo baydin xelqara jemiyetni rusiyening qanunsiz qoshuwélish qedemlirini ret qilishqa chaqirip, «amérika dölet mejilisining ukrainani qollap qoshumche 12 milyard dollar bérish qanun layihesini imzalashni taqetsizlik bilen kütüwatimen» dédi.

yawropa ittipaqigha eza döletlerning rehberliri, rusiyening ukrainaning sherqidiki rayonlarni qanunsiz qoshuwélishini qetiy ret qilidighanliqini we qararni eyibleydighanliqini élan qilip: «biz rusiyening bahane süpitide ötküzgen qanunsiz référandum (omumiy xelq bélet tashlash paaliyiti)nimu, uning saxta we qanunsiz netijisinimu qetiy étirap qilmaymiz» dédi.

yawropa komissiyoni reisi won dér léyén ijtimaiy taratqu supisidiki adrésida  tarqatqan uchurida, rusiyeni ishghalchi dep atidi we naraziliqini «qanunsiz qoshuwélinghan yerlerning hemmisi ukrainaning zémini» dégen sözler bilen ipadilidi.

xitay, ukrainadiki référandumdin kéyin kirizisni hel qilish üchün tereplerni söhbet ötküzüshke chaqirip, özining jiddiychilikni peskuygha chüshürüsh üchün xelqara jemiyetning ezaliri bilen birlikte ijabiy rol oynashqa teyyar ikenlikini bildürdi.

gherb döletlirining birleshken döletler teshkilati xewpsizlik kéngishige sunghan «eyiblesh layihesi» rusiyening ret qilishigha uchridi.