б д т түркийә билән гиретсийәни сөһбәтләрни давамлаштурушқа чақирди

бирләшкән дөләтләр тәшкилати (б д т) гиретсийә билән түркийәни «әгә деңизи» мәсилисини тинч усулда һәл қилиш үчүн сөһбәтләрни давамлаштурушқа чақирди.

1887133
б д т түркийә билән гиретсийәни сөһбәтләрни давамлаштурушқа чақирди

түркийә авази радийоси хәвири: б д т баш катипи байанатчиси стефан дуҗарик анадолу агентлиқи (AA) мухбириниң <гиретсийәниң хәлқаралиқ келишимләргә қаримай, әгә деңизидики бир қисим аралларға һәрбий топлаватқанлиқи тоғрисдики соалиға җаваб берип: «биз райондики җиддийликниң күчийиватқанлиқи вә афена билән әнқәрәниң бу һәқтики байанатлиридин хәвәрдармиз. җиддийликни күчәйтиветидиған һәрикәт вә ипадиләрдин сақлиниш муһим. бу арқа көрүнүштә, б д т баш катипи (антонийо гутеррес) барлиқ талаш - тартишларниң тинч усул билән һәл қилиниши керәкликини тәкрарлайду һәмдә гиретсийә билән түркийәни җиддий һаләтни пәскуйға чүшүрүш үчүн өзара сөһбәтни давамлаштурушқа илһамландуриду» деди.

дуҗарик йәнә, б д т ниң әза дөләтләрниң игилик һоқуқи вә деңиз-окйан районлирини башқуруш һоқуқи мәсилиси шундақла униң қануний өлчими тоғрисида позитсийә билдүрмәйдиғанлиқини сөзлиригә илавә қилди.

йәнә бир тәрәптин, гиретсийәдики асаслиқ өктичи партийә — сйризаниң рәһбири алекис чипрас, баш министир кирийакос мичотакс һөкүмитини дөләт тәвәликидики америка базилири мәсилиси бойичә тәнқид қилип, гиретсийәниң америка қошма иштатлириға бәргән базилириға мунасивәтлик келишимниң муддәтсиз икәнликини, буниң бәдилигә һечқандақ капаләт алмиғанлиқини тәнқид қилди.

гиретсийә һөкүмитиниң фирансийә билән имзалиған мудапиә һәмкарлиқ келишимидиму күткән қоллашқа еришәлмигәнликини тилға алған чипрас, 2021-йили түркийә билән йеңи бир таможна иттипақи келишими имзалаш пурситиниңму қолдин кәткәнликини оттуриға қойди.



مۇناسىۋەتلىك خەۋەرلەر