réznikof: «rusiye dunyaning ikkinchi küchlük armiyesige ige sepsetisi»ni bitchit qilduq

türkiye awazi radiyosi xewiri: oléksiy réznikof yawropa siyaset analizi teripidin uyushturulghan «ittipaq achalda» namliq yighingha sin körünüshlük halette qatniship, ukraina armiyesige wakaliten «erkinlik jengchisi mukapati»ni tapshurup aldi hemde yighinda söz qilip: «ötken yili qishta, nurghunlighan hörmetke sazawer kishiler kiyéwning üch künde qoldin kétidighanliqigha, pütkül ukrainaning ikki hepte ichide gumran bolidighanliqigha ishengenidi. biz 200 kündin artuq waqittin buyan küchlük shekilde berdashliq bériwatimiz. gherbning yardimi bilen, armiyemiz rus armiyesining dunyaning ikkinchi küchlük armiyesi ikenliki toghrisidiki sepsetini yer bilen yeksan qildi» dédi hemde rusiye armiyesining qéchishqa bashlighanliqini, rusiyening meghlubiyetke yüzlengenlikini ilgiri sürdi.

ukrainaning hergiz teslim bolmaydighanliqini tekitligen ukrainaliq ministir sözini dawamlashturup: «biz xelqimizge qarshi yéngi bir bésimgha  qetiy yol qoymaymiz. ukraina xelqi qolidiki qorallar bilen heqiqiy musteqilliq üchün küresh qiliwatidu. emma bu biz üchün emes, erkin dunyaning négizlik qimmet qarashliri üchün qiliniwatqan bir urush. bu urush yéngi dunya tertipini déngiz qaraqchiliri quramdu yaki démokratik döletler qurup chiqamdu? mesilisini belgileydighan urushtur.

ikkinchi dunya urushidin kéyin yéngi bir dunyawi urushning aldini élish meqsitide qurulghan birleshken döletler teshkilati (b d t), yawropa bixeterlik we hemkarliq teshkilati qatarliq barliq organlar meghlubiyetke uchridi. dunyaning yéngi qaidilirini kimning yazidighanliqigha bu urush qarar qilidu. yawropa, amérika we qaide – tüzümlerge asasen kishilik hoquq we erkinlik himaye qilinidighan, térrorluq, irqiy qirghinchiliq we zulumgha orun yoq bir dunya berpa qilishni xalaydighanlarning hemmisi ukrainagha yardem bérishi shert» dédi.

ministir réznikof, ukrainaning jeng qilalaydighanliqini we urushta ghelibe qilishqa teyyar ikenlikini ispatlighanliqini tilgha élip: «emma biz qoralgha mohtaj. bu qorallar yawropa we shimaliy atlantik ehdi teshkilatining sherqiy chégrasini mustehkemleshkimu paydiliq» dédi.

rusiye armiyesi 24-féwral ukrainagha bésip kirip, ishghal herikiti bashlighanidi.