резникоф: «русийә дунйаниң иккинчи күчлүк армийәсигә игә сәпсәтиси»ни битчит қилдуқ

украина дөләт мудапиә министири олексий резникоф, дөлитиниң «русийә армийәсиниң дунйаниң иккинчи күчлүк армийәси икәнлики тоғрисидики сәпсәти»ни вәйран қилғанлиқини ейтти.

1886275
резникоф: «русийә дунйаниң иккинчи күчлүк армийәсигә игә сәпсәтиси»ни битчит қилдуқ

түркийә авази радийоси хәвири: олексий резникоф йавропа сийасәт анализи тәрипидин уйуштурулған «иттипақ ачалда» намлиқ йиғинға син көрүнүшлүк һаләттә қатнишип, украина армийәсигә вакалитән «әркинлик җәңчиси мукапати»ни тапшуруп алди һәмдә йиғинда сөз қилип: «өткән йили қишта, нурғунлиған һөрмәткә сазавәр кишиләр кийевниң үч күндә қолдин кетидиғанлиқиға, пүткүл украинаниң икки һәптә ичидә гумран болидиғанлиқиға ишәнгәниди. биз 200 күндин артуқ вақиттин буйан күчлүк шәкилдә бәрдашлиқ бериватимиз. ғәрбниң йардими билән, армийәмиз рус армийәсиниң дунйаниң иккинчи күчлүк армийәси икәнлики тоғрисидики сәпсәтини йәр билән йәксан қилди» деди һәмдә русийә армийәсиниң қечишқа башлиғанлиқини, русийәниң мәғлубийәткә йүзләнгәнликини илгири сүрди.

украинаниң һәргиз тәслим болмайдиғанлиқини тәкитлигән украиналиқ министир сөзини давамлаштуруп: «биз хәлқимизгә қарши йеңи бир бесимға  қәтий йол қоймаймиз. украина хәлқи қолидики қораллар билән һәқиқий мустәқиллиқ үчүн күрәш қиливатиду. әмма бу биз үчүн әмәс, әркин дунйаниң негизлик қиммәт қарашлири үчүн қилиниватқан бир уруш. бу уруш йеңи дунйа тәртипини деңиз қарақчилири қурамду йаки демократик дөләтләр қуруп чиқамду? мәсилисини бәлгиләйдиған уруштур.

иккинчи дунйа урушидин кейин йеңи бир дунйави урушниң алдини елиш мәқситидә қурулған бирләшкән дөләтләр тәшкилати (б д т), йавропа бихәтәрлик вә һәмкарлиқ тәшкилати қатарлиқ барлиқ органлар мәғлубийәткә учриди. дунйаниң йеңи қаидилирини кимниң йазидиғанлиқиға бу уруш қарар қилиду. йавропа, америка вә қаидә – түзүмләргә асасән кишилик һоқуқ вә әркинлик һимайә қилинидиған, террорлуқ, ирқий қирғинчилиқ вә зулумға орун йоқ бир дунйа бәрпа қилишни халайдиғанларниң һәммиси украинаға йардәм бериши шәрт» деди.

министир резникоф, украинаниң җәң қилалайдиғанлиқини вә урушта ғәлибә қилишқа тәййар икәнликини испатлиғанлиқини тилға елип: «әмма биз қоралға моһтаҗ. бу қораллар йавропа вә шималий атлантик әһди тәшкилатиниң шәрқий чеграсини мустәһкәмләшкиму пайдилиқ» деди.

русийә армийәси 24-феврал украинаға бесип кирип, ишғал һәрикити башлиғаниди.



مۇناسىۋەتلىك خەۋەرلەر