йенс столтенберг: нато билән русийә урушуп қалса, әһвал техиму хәтәрлик болиду

шималий атлантик әһди тәшкилати — нато баш катипи йенс столтенберг: «әгәр биз русийә пирезиденти виладимир путинниң йадро қорали тоғрисидики реторик хитаблирини қайта - қайта аңлисақ, униңға әстайидил муамилә қилишимизға тоғра келиду» деди.

1885528
йенс столтенберг: нато билән русийә урушуп қалса, әһвал техиму хәтәрлик болиду

түркийә авази радийоси хәвири: йенс столтенберг сотсийалистлар вә демократлар гурупписиниң йавропа парламентидики йиғинидики сөзидә, натониң украина урушиға мунасивәтлик <украинани қоллаш вә тоқунушниң кәскинлишип кетишиниң алдини елиштин ибарәт икки түрлүк вәзиписи> барлиқини оттуриға қойди.

баш катип столтенберг, русийәниң йеқинқи күнләрдә «сахта реферандум (омумий хәлқ авазға қойуш паалийити), йадро алдамчилиқи, қораллиқ күчләрни сәпәрвәр қилиш» қатарлиқ қәдәмләрни ташлаш арқилиқ тоқунушни күчәйтивәткәнликини тәкитләп: «бизниң сөзимиз шуки, йадро қораллирини ишлитиш қәтий қобул қилинмайду. бундақ қилиш тоқунушниң маһийитини пүтүнләй өзгәртиветиду. русийә йадро урушида ғәлибә қилғили болмайдиғанлиқини, бундақ урушни қәтий қилмаслиқ керәкликини билиши керәк» деди.

у сөзини давамлаштуруп: «путинниң йадро қорали тоғрисидики реторик хитаблирини қайта - қайта аңлисақ, униңға әстайидил муамилә қилишимизға тоғра келиду. шуңа, буниң русийәгә еғир ақивәтләрни елип келидиғанлиқини вә йадро урушини қәтий қилмаслиқ керәклики учурини рошән шәкилдә билдүримиз. униңдин кейин башқа бир хил җиддийләштүрүш һалити оттуриға чиқиду. бу украинадин һалқиған җиддийчилик болиду. нөвәттә украинада давамлишиватқан уруш украина хәлқи үчүн начар вә паҗиәлик бир уруш, әлвәттә. әмма нато билән русийә оттурисидики толуқ қоралланған һаләттики бир уруш техиму начар болиду» дегәнләрни қәйт қилди.



مۇناسىۋەتلىك خەۋەرلەر