б д т: әзәрбәйҗан – әрменийә оттурисидики сүркилиштин әндишә қиливатимиз
бирләшкән дөләтләр тәшкилати әзәрбәйҗан – әрменийә оттурисида йеқинқи күнләрдә барғансери әвҗ елип кетиватқан сүркилишни әндишә қиливатқанлиқини вә икки дөләт оттурисида һасил қилинған уруш тохтитиш келишимидин хурсән икәнликини билдүрди.
түркийә авази радийоси хәвири: бирләшкән дөләтләр тәшкилати хәвпсизлик кеңишиниң «хәлқара тинчлиқ вә бихәтәрликни қоғдаш» темилиқ йиғинида, әзәрбәйҗан билән әрменийә оттурисидики тоқунушлар һәққидә музакирә елип берилди.
бирләшкән дөләтләр тәшкилати сийасий ишлар бөлүми йавропа, оттура асийа вә америка қошма иштатлири ишлириға мәсул муавин баш катипи мирослав җенка, йиғинда қилған сөзидә, икки дөләт оттурисида алдинқи күни һасил қилинған уруш тохтитиш келишимидин хурсән икәнликини әскәртти, һәмдә бирләшкән дөләтләр тәшкилатиниң тәрәпләрниң бир-биригә болған дәвалирини испатлаш һоқуқи йоқлуқини тәкитләп мундақ деди: «әмма, биз бу хәтәрлик сүркилишниң барғансери әвҗ елип кетишидин, җүмлидин, буниң пуқраларға болған тәсиридин қаттиқ әндишә қиливатимиз, тәрәпләрни җиддий вә кәскин тәдбир қоллинип, җиддий вәзийәтни пәсәйтишкә чақиримиз.»
бу һәптә икки дөләт оттурисида йүз бәргән вәқәләрниң, районни муқимсизлаштуруш характерлик йошурун күчи барлиқиниң наһайити рошән һалда испатланғанлиқини қәйт қилған җенка, хәлқара җәмийәтниң, тәрәпләр оттурисидики мәвҗут җиддийчиликни азайтиш арқилиқ киризисни тинч йол билән һәл қилиш чарисидә чиң туруш үчүн давамлиқ тиришчанлиқ көрситиши керәкликини тәкитлиди.
әзәрбәйҗан дөләт мудапиә министирлиқи, 12 – сентәбир кечиси вә 13 – сентәбир әтигән тәрәпләрдә әрменийә армийәсиниң әзәрбәйҗан билән болған чегра линийәсиниң даскәсән, кәлбәҗәр, лачин вә зәнгилан йөнилиштилиридә кәң даирилик иғвагәрчилик һәрикәтлирини елип барғанлиқини уқтурғаниди.
министирлиқ, тоқунушларда әзәрбәйҗан армийәсиниң 71 әскириниң шеһит болғанлиқини билдүргәниди.
әрменийә баш министири никол пашинйан болса, тоқунушларда 105 әрменийә әскириниң өлгәнликини җакарлиғаниди.
