ئەرمېنيەدە پاشىنياننى ئىستېپاغا چاقىرىش سادالىرى ياڭراشقا باشلىدى

تۈركىيە ئاۋازى رادىيوسى خەۋىرى:ئەرمېنىيە «نىيۇس ئا م» ئاگېنتلىقى 44 كۈن داۋام قىلغان ئىككىنچى قاراباغ ئۇرۇشىدا (2020) جېنىدىن ئايرىلغانلارنىڭ يېقىن-يورۇقلىرىنىڭ تۈنۈگۈن (2022-يىلى 14-سېنتەبىر) پايتەخي يېرىۋاندا پارلامېنت بىناسى ئالدىدا يىغىلىپ، باش مىنىستىر نىكول پاشىنيانغا قارشى نامايىش قىلغانلىقىنى خەۋەر قىلدى.

نامايىشچىلار نىكول پاشىنيانغا ئىشەنچ ئاۋازى بېرىلمەسلىكىنى ۋە ھۆكۈمەتنىڭ ئىستېپا بېرىشىنى تەلەپ قىلدى.

كەچ تەرەپتە پارلامېنت بىناسى ئالدىدىكى نامايىشچىلار سانى كۆپەيدى، ساقچىلار پارلامېنتقا تۇتىشىدىغان كوچىنىڭ قاتنىشىنى توختاتتى. نامايىشچىلار پارلامېنت بىناسىنىڭ ئىشىك-دېرىزىلىرىنى چېقىشقا ئۇرۇندى ۋە پاشىنيانغا قارشى شوئار توۋلاپ، ئىستېپاغا چاقىردى.

ئەزەربەيجان دۆلەت مۇداپىئە مىنىستىرلىقى 12-سېنتەبىر كېچىسى (2022) ۋە 13-سېنتەبىر ئەتىگەندە، ئەرمېنىيە ئارمىيەسىنىڭ ئەزەربەيجان چېگراسىدىكى داشكەسەن، كەلبەسەر، لاچىن ۋە زەنگىلان يۆنۈلۈشىدە ئىغۋاگەرچىلىك قىلغانلىقىنى، نەتىجىدە 50 ئەسكەرنىڭ شېھىت بولغانلىقىنى ئۇقتۇرغان ئىدى.

ئەزەربەيجان دۆلەت مۇداپىئە مىنىستىرلىقى باياناتىدا يەنە، توقۇنۇشلاردا 105 ئەرمېنىيە ئەسكىرىنىڭ ئۆلگەنلىكىنىمۇ بىلدۈرگەن ئىدى.