kaliforniye sahillirini ölük béliq bésip ketti
amérikaning gherbiy déngiz qirghiqigha jaylashqan kaliforniye ishtati déngiz qirghaqlirida zeherlengen minglighan ölük béliqlar sahilgha chiqip qaldi.
türkiye awazi radiyosi xewiri: kaliforniyening bolupmu sanfiransisko qoltuqi dep atilidighan déngiz qoltuqi rayonida, déngizning heddidin ziyade bulghinishi we sudiki oksigén miqdarining aziyishi netijiside, déngiz sahilini qaplighan keng kölemlik béliq ölümliri körüldi.
«San Francisco Baykeeper» namliq muhit asrash pidaiyliri teshkilatining tor bétide, «yazning béshida peyda bolidighan yüsünlishish zoraydi. hazir shimaliy, jenubiy we ottura san firansisko qoltuqi etrapidiki qirghaqlargha éghir tesir körsetmekte» déyildi.
bayanatta, su terkibidiki oksigénni istémal qilip, zeherlik maddilarni ishlepchiqiridighan yüsünlerning san firansisko qoltuqida onminglighan béliqning keng kölemde ölüshini keltürüp chiqarghanliqi, yüsünlerning insanlargha jiddiy xeter élip kelmisimu, béliqlargha we yawayi haywanlargha ziyan yetküzidighan toksinlarni (zeherlik maddilarni) tarqitidighan ziyanliq tür ikenliki bildürüldi.
bayanatta puqralarning insanlar we ermek haywanlarning salametlikke bolghan tesiri toghrisidiki éniqsizliqni közde tutqan halda, zeherlik yüsünlerning tesirige uchrighan rayonlarda tutulghan béliqlarni, bolupmu qulule béliqini istémal qilishtin éhtiyat qilishi tewsiye qilindi.
