тәйвән әтрапида хитайға тәвә 30 уруш айропилани вә 5 уруш парахоти көрүлди

тәйвән хитайға тәвә 30 уруш айропилани вә 5 уруш парахотиниң арал әтрапида көрүлгәнликини елан қилди.

1868121
тәйвән әтрапида хитайға тәвә 30 уруш айропилани вә 5 уруш парахоти көрүлди

түркийә авази радийоси хәвири: тәйвән дөләт мудапиә министирлиқиниң байанатида, шу йәрниң вақти 17.00 дә хитай армийәсигә тәвә 30 уруш айропилани вә 5 уруш парахотиниң арал әтрапида көрүлгәнлики елан қилинди.

байанатта, 15 хитай айропиланиниң тәйвән боғузидики «тәрәпләрниң тәсир даирисини чәкләш райони» дәп қобул қилинған һава вә деңиз линийәсиниң шәрқигә учқанлиқи  уқтурулди.

байанатта, хитайға тәвә һава вә деңиз вастилириниң тәйвәнгә тәвә електронлуқ из қоғлаш қорали, чарлаш айропилани, парахот вә йәр йүзи башқурулидиған бомба системиси арқилиқ из қоғлап көзитилгәнлики тәкитлинип, «биз хитай армийәсиниң һәрбий маневирни елан қилиш арқилиқ районниң тинчлиқи вә муқимлиқиға еғир зийан йәткүзгәнликини әйибләймиз» дейилди.

америка палата әзаси вәкилләр өмики тәйвәнни зийарәт қилғандин кейин, хитай армийәси арал әтрапида «һәрбий чарлаш паалийити вә маневир» башлиғанлиқини җакарлиған иди.

хитай армийәси шәрқ фронти қоманданлиқ иштабиниң байанатчиси ши йи «тәйвән әтрапида бирләшмә җәң тәййарлиқи чарлаш  паалийәтлири вә һәқиқий уруш маневири» өткүзүдиғанлиқлирини елан қилған иди.

хитай дөләт мудапиә министирлиқиниң байанатчиси ву чйәнму америка палата әзаси вәкилләр өмикиниң зийаритиниң тәйвән боғузида тинчлиқ вә муқимлиқини бузуштики американиң ролини ашкарилиғанлиқини  билдүрүп, «армийәниң тәйвән әтрапидики деңизда вә һава бошлуқида бирләшмә маневир өткүзүши вә мәшиқ қилиши, америка билән тәйвәнниң җинайи бирликигә һәмдә иғвагәрчиликигә билдүрүлгән наразилиқтур» дегән иди.

 


خەتكۈچ: #хитай , #тәйвән

مۇناسىۋەتلىك خەۋەرلەر