қаһирәдики черкавда йүз бәргән от апитидә қаза қилғанларға төләм берилидиған болди

мисирниң пайтәхти қаһирәниң ғәрбидики имбаба районида бир черкавда йүз бәргән от апитидә һайатидин айрилғанларниң аилә-тавабиатлири вә йариланғанларға төләм берилидиған болди.

1867733
қаһирәдики черкавда йүз бәргән от апитидә қаза қилғанларға төләм берилидиған болди

түркийә авази радийоси хәвири: мисир иҗтимаий һәмкарлиқ министирлиқи 41 киши қаза қилған вә 14 киши йариланған әбу сәйфейн черкавидики от апити вәқәси һәққидә йазма байанат елан қилди.

байанатта, черкавдики от апитидә қаза қилғанларниң аилә-тавабиатлири вә йариланғанларға төләм берилидиғанлиқи шундақла бир йил бойичә айлиқ мааш берилидиғанлиқи елан қилинди.

от апитидә һайатидин айрилғанларниң аилә-тавабиатлириға 25 миңдин 50 миңғичә кони (тәхминән 1307 доллардин 2614 долларғичә) йариланғанларға 5 миң куни (тәхминән 261 доллар) төләм берилидиғанлиқи уқтурулди.

буниңдин башқа йәнә, мәзкур аилә вә йариланғанларға йардәм мәқситидә бир йил бойичә айлиқ мааш берилидиғанлиқи тәкитләнди.

қаһирәниң ғәрбидики имбаба райониға җайлашқан әбу сәйфейн черкавида түнүгүн диний мурасим җәрйанида от апити йүз бәргән иди.

мисир қипти черкавидики от апитидә 41 киши қаза қилип, 14 киши йариланған иди.

мисир ички ишлар министирлиқи, ток еқимидики җалаймиқанчилиқ сәвәбидин черкавниң иккинчи қәвитидики һава тәңшигүчкә от кетиши нәтиҗисидә от апити йүз бәргәнликини билдүргән иди.



مۇناسىۋەتلىك خەۋەرلەر