xelqara jemiyet israiliyening ghezzege qaratqan hujumlirigha inkas qayturdi

türkiye awazi radiyosi xewiri: yawropa ittipaqining tashqi munasiwet we bixeterlik siyasiti boyiche aliy wekili josép borrélning ishxanisi, yawropa ittipaqining «ghezzediki özgirishlerni küchlük endishe ichide yéqindin közitiwatqanliqi»ni bildürüp: «yawropa ittipaqi jiddiychilikning téximu keskinliship kétishi we téximu köp insanning hayatidin ayrilishining aldini élish üchün her qaysi tereplerni eng küchlük derijide soghuqqan bolushqa chaqiridu. israiliye puqralirini qoghdash hoquqigha ige bolsimu, aldi bilen her ikki terep puqralargha tesir körsitidighan, téximu köp kishining hayatidin ayrilishi we azablinishini keltürüp chiqiridighan keng dairilik toqunushning aldini élish üchün barliq tirishchanliqlarni körsitishi kérek» dégenlerni qeyt qildi.

islam hemkarliq teshkilati, israiliye armiyesining ghezze rayonigha qaratqan shepqetsizlerche hujumini küchlük eyibleydighanliqini bildürgen bolsa, ereb parlaménti bayanat élan qilip, ghezze rayonidiki puqrawi orunlarni bombardiman qilishning xelqara qanungha ochuq – ashkara doél élan qilish we xelqara ehdiname, kélishim we pirinsiplargha xilapliq qilish bolidighanliqini bildürüp, xelqara jemiyetni pelestin xelqige qaritilghan bu tajawuzchiliqni derhal toxtitish üchün heriketke ötüshke chaqirdi.

liwiye, yemen, iran, rusiye we firansiyemu israiliyening ikki kündin buyan dawamlishiwatqan ghezze hujumini eyibleb bayanat élan qilip, ghezzede dawamlishiwatqan jiddiychiliktin endishe qiliwatqanliqini bildürdi.

israiliye armiyesi 5-awghust qorshawdiki ghezze rayonidiki islamiy jihad herikitining merkezlirige hujum qozghighan bolup, hujumlarda altisi kichik bala, ikkisi ayal bolup jemiy 24 kishining qaza qilghanliqi, 203 kishining yarilanghanliqi bildürülgenidi.