хәлқара җәмийәт исраилийәниң ғәззәгә қаратқан һуҗумлириға инкас қайтурди
йавропа иттипақи исраилийәниң муһасириси астидики ғәззәгә қилған һуҗумидин кейин, «һәр қайси тәрәпләрни» пүтүн күчи билән соғуққанлиқни сақлап қелишқа чақирди.
түркийә авази радийоси хәвири: йавропа иттипақиниң ташқи мунасивәт вә бихәтәрлик сийасити бойичә алий вәкили җосеп боррелниң ишханиси, йавропа иттипақиниң «ғәззәдики өзгиришләрни күчлүк әндишә ичидә йеқиндин көзитиватқанлиқи»ни билдүрүп: «йавропа иттипақи җиддийчиликниң техиму кәскинлишип кетиши вә техиму көп инсанниң һайатидин айрилишиниң алдини елиш үчүн һәр қайси тәрәпләрни әң күчлүк дәриҗидә соғуққан болушқа чақириду. исраилийә пуқралирини қоғдаш һоқуқиға игә болсиму, алди билән һәр икки тәрәп пуқраларға тәсир көрситидиған, техиму көп кишиниң һайатидин айрилиши вә азаблинишини кәлтүрүп чиқиридиған кәң даирилик тоқунушниң алдини елиш үчүн барлиқ тиришчанлиқларни көрситиши керәк» дегәнләрни қәйт қилди.
ислам һәмкарлиқ тәшкилати, исраилийә армийәсиниң ғәззә райониға қаратқан шәпқәтсизләрчә һуҗумини күчлүк әйибләйдиғанлиқини билдүргән болса, әрәб парламенти байанат елан қилип, ғәззә районидики пуқрави орунларни бомбардиман қилишниң хәлқара қанунға очуқ – ашкара доел елан қилиш вә хәлқара әһдинамә, келишим вә пиринсипларға хилаплиқ қилиш болидиғанлиқини билдүрүп, хәлқара җәмийәтни пәләстин хәлқигә қаритилған бу таҗавузчилиқни дәрһал тохтитиш үчүн һәрикәткә өтүшкә чақирди.
ливийә, йәмән, иран, русийә вә фирансийәму исраилийәниң икки күндин буйан давамлишиватқан ғәззә һуҗумини әйибләб байанат елан қилип, ғәззәдә давамлишиватқан җиддийчиликтин әндишә қиливатқанлиқини билдүрди.
исраилийә армийәси 5-авғуст қоршавдики ғәззә районидики исламий җиһад һәрикитиниң мәркәзлиригә һуҗум қозғиған болуп, һуҗумларда алтиси кичик бала, иккиси айал болуп җәмий 24 кишиниң қаза қилғанлиқи, 203 кишиниң йариланғанлиқи билдүрүлгәниди.
