xitay nensi pélosining teywen ziyaritini eyiblidi

xitay amérika awam palatasi bashliqi nensi pélosining teywen ziyaritini eyiblidi.

1862936
xitay nensi pélosining teywen ziyaritini eyiblidi

türkiye awazi radiyosi xewiri: xitay tashqi ishlar ministirliqi amérika awam palatasi bashliqi nensi pélosi olturghan ayropilanning teywenge yétip bérishidin kéyinla derhal bayanat élan qilip, xitayning qarshiliq bildürüshi we naraziliqlirigha qarimay qilinghan bu ziyaretning, «bir xitay» pirinsipi we amérika – xitay diplomatik munasiwitining asasini teshkil qilghan «üch birleshme xitabname»diki (1979) wedilerge éghir xilap ikenlikini otturigha qoydi.

xitayning bu ziyaretni eyibleydighanliqi we amérikagha naraziliq bildüridighanliqigha isharet qilinghan bayanatta: «bu qilmish ot oynashqa oxshaydu, bu intayin xeterlik ish, ot oynighan kishi özini köydürüwalidu» dédi.

bayanatta, pélosining ziyaritining xitayning igilik hoquqi we zémin pütünlükige dexli-teruz qilghanliqi, teywen boghuzining tinchliqi we muqimliqigha buzghunchiliq salghanliqi we teywenning musteqilliqini yaqlighuchi bölgünchi küchlerge xata uchur bergenliki ilgiri sürülüp: «dunyada peqet birla xitay bar, teywen uning zéminining ayrilmas bir qismi. xitay xelq jumhuriyiti hökümiti pütkül xitayning birdinbir qanunluq wekili. <bir xitay> pirinsipi xelqara jemiyet teripidin omumyüzlük étirap qilinghan ortaq tonush bolup, xelqara munasiwetlerning asasiy qaidisidur» déyildi.

xitay tashqi ishlar ministiri wang yimu nensi pélosining teywen ziyaritini eyiblep, xitayning barliq agahlandurush we naraziliqlirigha qarimay élip bérilghan bu ziyaretning, xitayning igilik hoquqigha yaman gherezde dexli-teruz qilishni meqset qilghan gherezlik siyasiy ighwagerchilik ikenlikini ilgiri sürdi.

bu ziyaretning xitay xelqining ghezipini qozghighanliqini tekitligen wang: «(pélosining ziyariti), bir qisim amérika siyasiyonlirining xitay-amérika munasiwitide «mesile peyda qilghuchilar»gha, amérikaning bolsa, teywen boghuzidiki tinchliq we rayon muqimliqining <eng chong weyran qilghuchisi>gha aylanghanliqini yene bir qétim delillidi» dédi.

u yene, <bir xitay> pirinsipining xelqara munasiwetke yétekchilik qildiighan asasiy qaide, hemde ikkinchi dunya urushidin kéyinki (1939-1945) xelqara tertipning asasliq amillirining biri ikenlikini sözlirige ilawe qildi.



مۇناسىۋەتلىك خەۋەرلەر