: shotlandiyening «musteqilliq référandumi» ötküzüsh telipi ret qilindi

türkiye awazi radiyosi xewiri: engiliye bash weziri boris jonson, bu heqte shotlandiye rayonluq hökümitining bash ministiri nikola sturgongha yazghan xétide, mundaq dédi: «yene bir qétim  <musteqilliq référandumi> ötküzülüshi meqsitide engiliye parlaméntidin, shotlandiye parlaméntigha hoquq bérilishi toghrisidiki delilliringizni estayidil közdin kechürüp chiqtim. dölitimiz dölet ichi - sirtida misli körülüp baqmighan xirislargha duch kéliwatqanliqi üchün, 2014-yili shotlandiye xelqi éniq jawab bergen bir soalgha qayta jawab bérishning waqti kelgenliki mesiliside oxshash pikirde emesmen.»

jonson xétide, engliye we shotlandiye hökümetlirining köpligen mesililerde hemkarliq ornitiwatqanliqini tekitlidi.

shotlandiye rayonluq hökümitining bash ministiri nikola sturgon bolsa, ammiwi ortaqlishish tor béti Twitter sehipiside, engliye bash weziri boris jonsonning özige yazghan xétini hembehirlep, buning, jonsonning «bash wezir süpitide qilghan eng axirqi ishliridin biri» ikenlikini eskertip mundaq dédi: «ochuq qilip éytqanda, shotlandiye <musteqilliq> ni tallash pursitige érishidu. 2023-yili 19 – öktebir küni ötküzülidighan référandumda érishelmisimu, omumiy saylamda érishishini ümid qilimen. shotlandiye démokratiyesi bu yaki bashqa bir bash wezirning mehbusi bolmaydu.»

shotlandiye milliy partiyesi rehbiri sturgon, 28-iyun élan qilghan bayanatida, 2023-yili 19 – öktebir küni «musteqilliq référandumi» ötküzüshni pilanlawatqanliqlirini, bu pilanning qanuniy dairisining békitilishi üchün aliy sot mehkimisige iltimas sunidighanliqlirini,  merkiziy hökümet bilenmu söhbet ötküzüshke teyyar ikenliklirini éytqanidi.

shotlandiye milliy partiyesi, 2014-yili ötküzülgen référandumda shotlandiyeliklerning % 55 ti musteqilliqni ret qilip awaz bergen bolushigha qarimay, engliyening 2020-yili yawropa ittipaqidin ayrilishining weziyetni özgertiwetkenlikini we yéngi référandumgha éhtiyaj barliqini ilgiri sürmekte.

engliyening yawropa ittipaqidin ayrilishigha munasiwetlik référandumda % 62 awaz bilen ret qilip bélet tashlighan shotlandiyelikler, özliri xalimighan bolushigha qarimay yawropa ittipaqidin chiqiriwétilgenliklirini otturigha qoymaqta.