nato türkiye heqqide bayanat élan qildi

türkiye awazi radiyosi xewiri: shimaliy atlantik ehdi teshkilati bash katipi stolténbérg finlandiye bilen shiwétsiyening natogha ezaliq üchün sunghan iltimasliri heqqide türkiyening bixeterlik endishilirini hel qilishqa tirishiwatqanliqlirini, bu ikki döletning qisqa waqit ichide natogha eza bolushining ishqa ashmasliq éhtimalliqining yuqiriliqini éytti.

stolténbérg, « Politico» namliq xelqara xewerler tor bétining neq meydan pirogrammisida, shiwétsiye bilen finlandiyening shimaliy atlantik ehdi teshkilatigha ezaliq üchün sunghan iltimaslirigha munasiwetlik soalgha jawab bergende, nato ichide köp qétim oxshimighan qarashlarning otturigha qoyulghanliqini eskertti.

u, 1950 – yillardiki suweysh kirizisini, 1960 – yillardiki firansiyening natoning herbiy qanitidin ayrilishini, 1970 – yillardiki afriqa we wéytnam urushlirini, kéyinki yillardiki iraq urushida shimaliy atlantik ehdi teshkilati ittipaqdashliri otturisidiki pikir ixtilaplirini buninggha misal körsitip mundaq dédi: «bu heyran qalarliq ishmu emes, chünki biz oxshimighan siyasiy partiyelerge, oxshimighan tarixqa ige, oxshash bolmighan jughrapiyelerdiki 30 oxshimighan döletmiz. oxshimasliqlargha qarimay, bir-birimizni qoghdashta muressechilik asasida heriket qilimiz. finlandiye bilen shiwétsiye mesilisidimu muressechilik ichide heriket qiliwatqanliqimizgha ishinimen. lékin, nöwette qilishqa tégishlik ishimiz, türkiyege oxshash ittipaqdashlar otturgha qoyuwatqan oxshimighan qarashlar we endishilerni hel qilishtur. türkiyening eng köp térrorluq hujumlirigha uchrighan dölet we nato ittipaqdishi ikenlikini qobul qilishimiz kérek. türkiye, iraq we süriyege chégridash bolghan nahayiti zor ehmiyet ige bir dölettur. derweqe, türkiye térrorizmgha qarshi  küreshte nahayiti muhim rol oynidi we oynawatidu. shuning bilen bir waqitta, türkiye qaradéngiz döliti süpitide nahayiti muhim rolgha ige. mesilen, nöwette ukrainadin ashliqning chiqirilishi üchün türtkilik rol oynimaqta hem muhim xizmetlerni ishlimekte. türkiye endishilirini otturigha qoysa, elwette biz bu endishilerni hel qilishqa tirishimiz. derweqe, hazir bizmu del shundaq qiliwatimiz. finlandiye we shiwétsiyening eng qisqa waqit ichide natogha eza bolushigha yol qoyush üchün bir chare tapalaydighanliqimizni ümid qilimen.»

shimaliy atlantik ehdi teshkilati ichide qararlarning 30 döletning ortaq tonush hasil qilishi netijiside chiqirilidighanliqini eskertken stolténbérg, bash katip bolush süpiti bilen, ikki döletning eng qisqa waqit ichide natogha eza bolushini nishan qiliwatqanliqini tekitlep mundaq dédi: «men buninggha kapaletlik qilalmaymen, emma bu méning nishanim, xalas. natogha eza  bolush basquchlirigha nezer tashlighinimizda, barliq ittipaqdashlarning oxshash nuqtidin bashlimighanliqini nezerdin saqit qiliwetmeslikimiz kérek. biz muressechilik yoli we ortaq zémin tépishimiz kérek. derweqe, biz bu heqte xizmet ishlewatimiz.»