b d t türkiyege minnetdarliq bildürdi

türkiye awazi radiyosi xewiri: birleshken döletler teshkilatining afghanistan alahide wekili yardemchisi we insanperwerlik yardem maslashturghuchisi ramiz elekberow, b d t ning niyu yorktiki bash merkizide ötküzülgen axbarat élan qilish yighinida bergen bayanatida, mundaq dédi: «türkiye elchixanisi mesulliri bilen alaqileshtim. birleshken döletler teshkilatining afghanistanda izdesh - qutquzush iqtidari yoq. shunga, türkiyening bu heqte eng yaxshi shekilde afghanistangha yardem béridighanliqigha ishinimiz. yémek - ichmek tarqitish merkezlirining qurulushida türkiye we pakistan dairiliri muhim rol oynimaqta we muhim xizmetlerni ishlimekte.»

türkiye dairilirining birleshken döletler teshkilatidin resmiy yardem telipi kütüwatqanliqini eskertken elekberow, mundaq dep körsetti: «biz resmiy yardem telipi sunushtin burun, bu mesile heqqide taliban bilen muzakire qilinishini kütüwatimiz. paktiya, jayan we bérmal nahiyeliridiki apet rayonlirida deslepki qedemde yardemde bolghan birleshken döletler teshkilati etretliri, shu tapta sahede bolup, téximu köp yardemni heriketke keltürüshke tirishiwatimiz.»

bu ariliqta, taliban, 5.9 bal chongluqtiki yer tewresh apitide köp sanda kishi ölüp ketkendin kéyin, xelqaraliq yardem chaqiriqida boldi.

talibanning yuqiri derijilik emeldari abdulqahhar belxi, hökümetning xelqning éhtiyajini qandurushtin ajiz qéliwatqanliqini eskertip mundaq dédi: «insanperwerlik yardem teshkilatliri, qoshna döletler we dunya küchliri yardem bériwatidu, lékin insanperwerlik yardemlerning miqdari keng dairide ashurulushi lazim. chünki, bu qétimqisi qanche on yildin buyan tunji qétim yüz bergen qattiq yer tewresh apitidur.»