б д т түркийәгә миннәтдарлиқ билдүрди

түркийә авази радийоси хәвири: бирләшкән дөләтләр тәшкилатиниң афғанистан алаһидә вәкили йардәмчиси вә инсанпәрвәрлик йардәм маслаштурғучиси рамиз әләкбәров, б д т ниң нийу йорктики баш мәркизидә өткүзүлгән ахбарат елан қилиш йиғинида бәргән байанатида, мундақ деди: «түркийә әлчиханиси мәсуллири билән алақиләштим. бирләшкән дөләтләр тәшкилатиниң афғанистанда издәш - қутқузуш иқтидари йоқ. шуңа, түркийәниң бу һәқтә әң йахши шәкилдә афғанистанға йардәм беридиғанлиқиға ишинимиз. йемәк - ичмәк тарқитиш мәркәзлириниң қурулушида түркийә вә пакистан даирилири муһим рол ойнимақта вә муһим хизмәтләрни ишлимәктә.»

түркийә даирилириниң бирләшкән дөләтләр тәшкилатидин рәсмий йардәм тәлипи күтүватқанлиқини әскәрткән әләкбәров, мундақ дәп көрсәтти: «биз рәсмий йардәм тәлипи сунуштин бурун, бу мәсилә һәққидә талибан билән музакирә қилинишини күтүватимиз. пактийа, җайан вә бермал наһийәлиридики апәт районлирида дәсләпки қәдәмдә йардәмдә болған бирләшкән дөләтләр тәшкилати әтрәтлири, шу тапта саһәдә болуп, техиму көп йардәмни һәрикәткә кәлтүрүшкә тиришиватимиз.»

бу арилиқта, талибан, 5.9 бал чоңлуқтики йәр тәврәш апитидә көп санда киши өлүп кәткәндин кейин, хәлқаралиқ йардәм чақириқида болди.

талибанниң йуқири дәриҗилик әмәлдари абдулқаһһар бәлхи, һөкүмәтниң хәлқниң еһтийаҗини қандуруштин аҗиз қеливатқанлиқини әскәртип мундақ деди: «инсанпәрвәрлик йардәм тәшкилатлири, қошна дөләтләр вә дунйа күчлири йардәм бериватиду, лекин инсанпәрвәрлик йардәмләрниң миқдари кәң даиридә ашурулуши лазим. чүнки, бу қетимқиси қанчә он йилдин буйан тунҗи қетим йүз бәргән қаттиқ йәр тәврәш апитидур.»