olaf sholz: gérmaniye ukrainagha qoral ewetishni dawamlashturidu

türkiye awazi radiyosi xewiri:gérmaniye bash ministiri olaf sholz «gérmaniye sanaet küni» munasiwiti bilen ötküzülgen yighinda söz qilip, gherb döletliri rusiyege qarshi yürgüzgen émbargolarning dölet iqtisadigha ziyan salghanliqini, biraq bu émbargolarning muhim ikenlikini bildürdi.

u gérmaniyening litwaniye we bashqa sherqiy ittipaqdashlirini küchlük qollighanliqini eskertip: «bir ish nahayiti éniqki, qollishimizgha éhtiyajliq bolghan ehwalda ukrainagha dawamliq qoral ewetimiz» dédi.

ukraina-rusiye urushining deslepki mezgilide, «enene boyiche urush we ixtilap bar bolghan rayonlargha qoral ewetmigenliki» ni tekitlep, ukrainagha qoral ewetishte éhtiyatchan siyaset yolgha qoyghan gérmaniye hökümiti, amérika we engliye qatarliq nurghun nato döletlirining qattiq tenqidige, shundaqla ichki siyasettimu zor tenqidlerge duch kelgen idi.

gérmaniye sanaet charqini aylandurush we öy-makanlarni issitishta yawropadiki bashqa döletlerge qarighanda, rusiyening néfit we tebiiy gazigha bekirek tayinidu. gérmaniye urushtin ilgiri tebiiy gaz éhtiyajining %55ni rusiyedin qamdaydighan bolup, yéqinqi künlerde bu éhtiyajni %35 ke chüshürdi.

gérmaniyede yene, turalghu binalirining texminen yérimi éghir sanaette éléktr ishlepchiqirish üchün ishlitilidighan tebiiy gaz bilen issitilidu.

rusiyege bolghan énérgiye béqindiliqini azaytish üchün köp tirishchanliq körsetken gérmaniye hökümiti, rusiye gazidin pütünley qutulush üchün waqitqa éhtiyajliq ikenlikini eskertmekte.

gérmaniye hökümiti gherb döletlirining rusiyege qarshi yürgüzgen émbargolirini qollisimu, emma rusiyedin gaz éhtiyajini derhal toxtitishqa qarshi chiqmaqta.

gérmaniye ilgirimu rusiye tebiiy bayliqlirigha bolghan béqindiliqi sewebidin amérikaning qattiq tenqidlirige duchar bolghan idi.

gérmaniye sanaet fédératsiyesi bügün (2022-yili 21-iyun) élan qilghan bayanatida, rusiyedin import qilinghan tebiiy gaz toxtitilghan ehwalda iqtisadta turghunluqtin qéchip qutulghili bolmaydighanliqi toghrisida agahlandurdi.