pirézidént baydin ukrainagha ilghar qorallarni béridighanliqlirini élan qildi
amérika pirézidénti jo baydin ukrainagha rusiyege qarshi urushta paydilinishi üchün tereqqiy qildurulghan bashqurulidighan bomba sistémilirini ewetishni qarar qilghanliqlirini élan qildi.
türkiye awazi radiyosi xewiri: amérika pirézidénti jo baydin niyu york taymés gézitide «amérikaning ukrainada qilidighan we qilmaydighan ishliri» témisida maqale élan qildi.
u maqaliside, ukraina-rusiye urushining 4-éyigha qedem qoyghanliqini bildürüp: «ukraina xelqi körsetken pidakarliqliri, qeyserliki we urush sépidiki muweppeqiyetliri bilen rusiyeni chöchütti, pütkül dunyagha ilham boldi» dédi.
u bashqa döletlerning ukrainagha herbiy, insaniy we iqtisadiy jehettin yardem qilghanliqini alahide eskertip, amérikaning bu urushta namayan qilghan meydanini chüshendürdi.
u: «amérikaning meqsiti nahayiti éniq: özini kélechektiki tehditlerge qarshi qoghdiyalaydighan, démokratik, musteqil, igilik hoquqluq we güllengen ukrainani körüshni xalaymiz. ukraina pirézidénti wolodimir zélénskiy dégendek, bu urushning axirida démokratiyening ghelbe qilghanliqini körimiz» dédi.
u maqaliside, ukrainagha yardem qilghan qoral-yaraghlar bilen bu döletning qolini söhbet üstilide küchlendürüshni meqset qilghanliqlirini eskertip: «bu sewebtin, ukrainagha urush sépidiki nuqtilargha oqni del tegküzeleydighan ilghar bashqurulidighan bomba sistémilirini we oq-dorilarni bérishni qarar qilduq» dédi.
u maqaliside rusiyege qarshi yürgüzülüwatqan émbargolarni téximu kücheytish mesilisi üstidimu toxtilip, bashqa döletler bilen birlikte dawamliq hemkarliship, amérikaning ukrainagha jawélin tanka atar sistémiliri, stingér ayropilan atarlar, radar sistémiliri, uchquchisiz hawa apparatliri we «Mi-17» tipliq tik ucharlar qatarliq ilghar qorallarni ewetishni dawamlashturidighanliqlirini qeyt qildi.
u ukraina bilen rusiye otturisidiki muzakirelerning «rusiyening démokratiyege dümbisini qiliwélishi» sewebidin toxtap qalghanliqini eskertip, amérikaning ukrainani muzakirelerde dawamliq qollaydighanliqini bildürdi.
u maqaliside töwendiki jümlilerge alahide orun ajratti:
«biz nato bilen rusiye otturisida urush yüz bérishini xalimaymiz. biz putin bilen kélishelmigen bolsaqmu, heriketlirige öktemlik dep qarighan bolsaqmu, amérika uni örüwétish üchün heriket qilmaydu. amérika we uning ittipaqdashlirigha hujum qilinmighan ehwal astida, amérika eskerliri ukrainagha ewetilmeydu we rusiyege qarshi urushmaydu. ukrainaning chégralirining sirtidiki jaylargha hujum qilishini qollimaymiz we undaq qilishigha yardem qilmaymiz.»
