دانىيە بىلەن شىۋېتسىيە ئۇكرائىناغا ھەربىي ياردەم بەردى

تۈركىيە ئاۋازى رادىيوسى خەۋىرى: دانىيە دۆلەت تېلېۋىزىيەسى د ر (DR) نىڭ خەۋىرىدە بىلدۈرۈلىشىچە، دانىيە دۆلەت مۇداپىئە مىنىستىرى مورتېن بودسكوۋ (Morten Bodskov) ئۇكرائىناغا 2 مىليارد كرون قىممىتىدە قورال-ياراغ ۋە باشقا ھەربىي ئۈسكۈنىلەردىن تەركىپ تاپقان ياردەملەرنىڭ يەتكۈزۈلگەنلىكىنى ئېلان قىلدى.

شىۋېتسىيە ھۆكۈمىتىمۇ ئۇكرائىناغا مەخپىي ھالدا يېڭى ھەربىي ياردەملەرنى ئەۋەتىدىغانلىقىنى جاكارلىدى. شىۋېتسىيە ھۆكۈمەت تور بېتىدىكى باياناتتا، ئۇكرائىناغا يۇقىرى نىسبەتتە ھەربىي ياردەم بېرىلىدىغانلىقىنى، مەخپىيەتلىك سەۋەبىدىن ياردەم مىقدارىنىڭ ئېلان قىلىنمايدىغانلىقى ئەسكەرتىلدى.

شىۋېتسىيە ئىلگىرى ئۇكرائىناغا 5 مىڭ دانە «AT4» تانكا ئاتار، 5 مىڭ دانە ئوق ئۆتكۈزمەيدىغان جىلىتكە، 5 مىڭ دانە پولات قالپاق ۋە 135 مىڭ ئەسكەرگە يېتىدىغان تەييار يېمەك-ئىچمەك ئەۋەتكەن ئىدى.