ukrainada tunji qétim bir rus eskiri muddetsiz qamaq jazasigha höküm qilindi
ukrainadiki bir sot mehkimiside sotlanghan tunji rus eskiri wadim shishimarin urush jinayiti sadir qilish we qesten adem öltürüsh bilen eyiblinip muddetsiz qamaq jazasigha höküm qilindi.
türkiye awazi radiyosi xewiri: paytext kiyéwdiki soloménskiy sot mehkimisi, 21 yashliq rus eskiri shishimarinni ukrainaning sumi rayonida bir puqrani öltürüsh bilen eyiblep, muddetsiz qamaq jazasigha höküm qildi.
hökümnamida, shishimarinning «qesten qatilliq qilghanliqi» qeyt qilindi we «jawabkarning jinayetni sadir qilghanliqining toluq ispatlanghanliqi» otturigha qoyuldi.
«shishimarinning urush jinayiti sadir qilghanliqi we uninggha héchqandaq xewp yetküzmigen bir puqrani qesten öltürgenliki» bildürülgen bayanatta, bu sewebtin uning muddetsiz qamaq jazasigha höküm qilinghanliqi eskertildi.
rusiye armiyesi bilen birlikte ukrainaning sumi rayonigha kirgen wadim shishimarin, 28-féwral chupaxowka baziridiki öyining aldida turghan qoral-yaraghsiz 62 yashliq aléksandir shépilowni béshigha étip öltürgenidi.
kéyin ukraina eskerliri teripidin esirge élinghan shishimarin heqqide <qesten adem öltürüsh we urush jinayiti sadir qilish bilen eyiblinip matériyal turghuzulghanliqi> bildürülgenidi.
soloménskiy sot mehkimisining 5 -ayning 18-küni bashlanghan rusiye eskiri wadim shishimaringha munasiwetlik soti, «rusiyening ukrainagha jeng élan qilghandin buyan rus eskiri toghrisida échilghan tunji sot» bolush alahidiliki bilen kishilerning diqqitini qozghighanidi.
rusiye armiyesi 24-féwral ukrainagha bésip kirip, ishghal herikiti bashlighanidi.
