aqsaray: finlandiye we shiwétsiye mesiliside ortaq tonush hasil qilinidighanliqigha ishinimiz

türkiye awazi radiyosi xewiri: jüme küni yén psakidin aqsaray bayanatchiliqi wezipisini ötküzüwalghan yén piérré tunji axbarat élan qilish yighinida, amérika qoshma ishtatliri tashqi ishlar ministiri antoni blinkénning, aldinqi küni gérmaniyening paytexti bérlinda, türkiyening shiwétsiye bilen finlandiyening shimaliy atlantik ehdi teshkilati ezaliqigha qarita pozitsiyesi toghruluq türkiye jumhuriyiti tashqi ishlar ministiri mewlüt chawushoghlu bilen körüshkenlikini tekitlep mundaq dédi: «shimaliy atlantik ehdi teshkilatigha eza bolush bir jeryanni teqezza qilidu, biz bu mesilide ortaq tonush hasil qilinidighanliqigha ishinimiz.»

amérika qoshma ishtatliri tashqi ishlar ministiri antoni blinkén, bérlinda ötküzülgen muxbirlarni kütüwélish yighinida, shiwétsiye bilen finlandiyening shimaliy atlantik ehdi teshkilatigha ezaliqi basquchi toghruluq toxtilip mundaq dégenidi: «türkiye jumhuriyiti tashqi ishlar ministiri mewlüt chawushoghlu bilen bu heqte körüshüsh pursitige érishtim. körüshüshning tepsilati heqqide melumat bermeymen, emma finlandiye bilen shiwétsiyening shimaliy atlantik ehdi teshkilatigha ezaliqi mesiliside küchlük ortaq tonush hasil qilinghanliqini éytish bilenla cheklinimen. türkiye, finlandiye we shiwétsiyening pikir oxshimasliqliri mesiliside muzakiriler dawamlashmaqta. netijide, bu ikki döletning natogha ezaliqi toghrisida ortaq tonush hasil qilidighanliqimizgha ishinimen.»

türkiyening finlandiye bilen shiwétsiyening shimaliy atlantik ehdi teshkilatigha ezaliqigha qarshi pozitsiyesi amérika qoshma ishtatliri dölet mudapie ministirliqidimu küntertipke keldi.

amérika qoshma ishtatliri dölet mudapie ministirliqi bayanatchisi jon kirbi, «türkiye shiwétsiyediki bölgünchi térrorluq teshkilati p k k ning mewjudiyiti tüpeyli bu döletning shimaliy atlantik ehdi teshkilatigha ezaliqigha qarshi ikenlikini otturgha qoydi. derweqe, amérika qoshma ishtatliri we pütkül shimaliy atlantik ehdi teshkilatigha eza döletler  p k k ni <térrorluq teshkilati> dep étirap qilmaqta. shiwétsiyege  p k k gha qarshi qedem tashlishini tewsiye qilamsiz?» teriqisidiki soalgha, buning amérika qoshma ishtatliri dölet mudapie ministirliqi pikir bayan qilidighan bir mesile emeslikini tekitlep mundaq dédi: «biz hazirmu türkiyening bu mesilidiki meydanini aydinglashturushqa tirishiwatimiz. türkiye shimaliy atlantik ehdi teshkilatining qimmetlik ittipaqdishi bolidu. shiwétsiyemu, finlandiyemu shimaliy atlantik ehdi teshkilatigha resmiy iltimas sunmidi. bu yerde bir jeryan bar. biz bu jeryanda asta ilgirilewatimiz. emma bizning beshburjeklik binadin bashqa bir döletning diplomatiye siyasitining qandaq bolidighanliqini belgilesh hoquqimiz yoq.»