shiwétsiye: p k k ning térrorluq teshkilati ikenlikige ishinimiz
shiwétsiye tashqi ishlar ministiri en lindé dölitining p k k ni térrorluq teshkilati dep qaraydighanliqini éytti.
türkiye awazi radiyosi xewiri: lindé jumhur reis rejep tayyip erdoghanning shiwétsiye bilen finlandiyening shimaliy atlantik ehdi teshkilati — natogha eza bolush musapisige munasiwetlik bayanati heqqide toxtilip: «yawropa ittipaqigha oxshashla, bizmu p k k ning bir térrorluq teshkilati ikenlikige ishinimiz» dédi.
«aftonblad géziti»ning xewirige asaslanghanda, lindé otturiliqta bir uqushmasliqning bolush mumkinlikini ilgiri sürüp: «bizning p k k ni térrorluq teshkilati dep qarimaydighanliqimiz toghra emes. eger ashundaq bir qarash shekillinip qalghan bolsa, bu aydinglashturulushi kérek. yekshenbe küni türkiye tashqi ishlar ministiri mewlüt chawushoghlu bilen körüshimiz» dégen.
finlandiye tashqi ishlar ministiri pékka xawistomu anadolu agéntliqigha bergen bayanatida, jumhur reis rejep tayyip erdoghanning finlandiye bilen shiwitsiyening natogha eza bolush musapisi toghrisidiki bayanati heqqide toxtilip: «nato ezaliqi mesilsiide türkiye bilen otturimizni ixtilapni yéngishimizni ümid qilimen» dédi.
xawisto «aftonblad géziti»ge bergen bayanatidimu dölitining charshenbe küni natogha ezaliq iltimasi sunidighanliqini bildürdi.
jumhur reis erdoghan jüme küni istanbulda shiwétsiye bilen finlandiyening natogha eza bolush jeryani heqqide muxbirlargha bayanat bérip: «: «biz nöwette shiwétsiye bilen finlandiyege munasiwetlik özgirishlerni közitiwatimiz. emma bizning bu heqtiki qarishimiz ijabiy emes. ilgiri, bizdin burunqi hökümetler girétsiyening natogha eza bolushi mesiliside xata qildi. girétsiyening natoni destek qilip turup, türkiyege tutuwatqan pozitsiyeisi silergimu ayan. türkiye bolush süpitimiz bilen, bu jehette ikkinchi qétim xataliq sadir qilishni xalimaymiz. buningdin bashqa, sikandinawiye döletliri, epsuski, térrorluq teshkilatining méhmanxanisigha oxshap qaldi. p k k, d h k p j qatarliqlar shiwétsiyege, gollandiyege uwa saldi. téximu ilgirilep otturigha qoyidighan bolsam, ular mezkur döletlerning parlaméntliridinmu orun almaqta. bundaq ehwalda, bizning bu ishqa ijabiy qarishimiz mumkin emes» dégenidi.
