gérmaniye bash ministiri ukrainadin aghrindi

türkiye awazi radiyosi xewiri: gérmaniye bash ministiri olaf sholz z d f (ZDF) téléwiziyesining ziyaritini qobul qilip, ukraina-rusiye urushi toghrisidiki soallargha jawab berdi.

u ukrainani qachan ziyaret qilidighanliqi toghrisidiki soalgha jawab bergende, gérmaniye pirézidéntining ziyaret telipining ret qilinghanliqining muhim weqe ikenlikini bildürdi.

u pirézidént frank woltér stéymméyérning ukrainani ziyaret qilsh telipining ret qilinishining, öziningmu ukrainani ziyaret qilishigha tosqunluq qilghanliqini eskertip: «shunchiwala herbiy we iqtisadiy yardemlerni qilghan, ukrainaning kélechiki üchün xewpsizlik kapaletlirige munasiwetlik weziyet otturigha chiqqanda éhtiyaji chüshidighan döletning pirézidéntigha <kelmisun> déyishke bolmaytti» dédi.

u gérmaniye hökümitining ukrainagha yardem qilishta ikkilengenliki toghrisidiki soalgha jawab bérip, ukrainagha qilinghan iqtisadiy we herbiy yardemlerning ukraina armiyesining urushta uzun muddet berdashliq bérishige muhim hessilerni qoshqanliqini, ukrainagha qiliniwatqan yardemlerning dawamlishidighanliqini ilgiri sürdi.

u gérmaniyening urushqa qatnashmaydighanliqini tekrarlap: «nishanimiz rusiyening urushni axirlashturushi we eskerlirini ukrainadin chékindürüshi. rusiye urushta ghelbe qilmasliqi, ukraina meghlub bolmasliqi kérek» dédi.

polsha we baltiq déngizi döletlirining rehberliri aprél éyining otturilirida gérmaniye pirézidénti frank woltér stéymméyér bilen kiyéwni bille ziyaret qilishni telep qilghan, emma ukraina pirézidénti wolodimir zélénskiyning frank woltér stéymméyér bilen körüshüshni xalimighanliqi ashkarilanghan idi.