gutérrs b d t xewpsizlik kéngishining muweppeqiyetsiz bolghanliqini tekitldi

b d t bash katipi antoniyo gutérrs ukraina ziyariti jeryanida xewpsizlik kéngishining urushning aldini élishta muweppeqiyet qazinalmighanliqini we kishilerni ümidsizlendürgenlikini bildürdi.

1820490
gutérrs b d t xewpsizlik kéngishining muweppeqiyetsiz bolghanliqini tekitldi

türkiye awazi radiyosi xewiri: b d t bash katipi antoniyo gutérrs kiyéwda ukraina pirézidénti wolodimir zélénskiy bilen birlikte ötküzgen axbarat élan qilish yighinida, ziyaret jeryanida rusiyening 24-féwral (2022) bashlighan urush seweb bolghan échinishliq ölüm-yétimlerge, éghir weyranchiliqlargha we kishilik hoquqqa xilap qilmishlargha shexsen shahit bolghanliqini éytti.

u xelqara jinayi ishlar sot mehkimisining ukrainadiki «urush jinayiti» tekshürüshini qollighanliqini bildürüp, mundaq dédi:

«tekshürüshning éhtiyajlirini belgilesh we tekshürüshning dairisini kéngeytish üchün bu yerge keldim. xewpsizlik kéngishi bu urushning aldini élish we urushni axirlashturushta qolidin kélishiche tirishchanliq körsetmidi, muweppeqiyetsiz boldi. bu kishilerni ümidsizlendürdi. emma, 1400 din artuq b d t xadimi jasaretlik halda ukraina teshkilatliri bilen bille her küni mörini mörige tirep ukraina xelqi üchün xizmet qiliwatidu. her bir qedimimizni ukraina hökümiti bilen kordinatsiye astida tirishchanliqlirimizni ashurushqa wede bérimen.»

u urushning axirlishishini we xelqaraliq qanun asasida tinchliqning ornitilishini chaqiriq qilip, urush toxtitish we insanperwerlik karidorlirining échilishi üchün dawamliq tirishidighanliqlirini qeyt qildi.

ukraina pirézidénti wolodimir zélénskiy bash katip antoniyo gutérrsning tinchliq üchün körsetken tirishchanliqlirini teqdirleydighanliqlirini bildürdi.

u: «bash katip ukraina sheherlirini aylinip, rusiye ötküzgen urush jinayetlirini neq meydandin körgen boldi. b d t kishilik hoquq kéngishining ispat toplash komitéti rusiye armiyesining jinayetlirini höjjetleshtürüshni dawamlashturushi kérek. emeliyet shuki, rusiyening ishghali ukraina zéminlirigha, puqralargha, tinchliqperwer sheherlerge qarshi. rusiye yawropa ikkinchi dunya urushidin buyan körmigen intayin köp jinayetlerni peyda qildi» dédi.

u rusiye pirézidénti wladimir putin mariyupolda urush toxtitish toghrisida bayanat élan qilghan bolsimu, emma azowstal métalurzhi fabrikasining izchil halda bombardimangha duch kelgenlikini bildürdi.

u mundaq dédi:

«ukraina azowstal métalurzhi fabrikasidin kishilerni tarqaqlashturush üchün derhal muzakire ötküzüshke we hasil qilinghan kélishimlerni ijra qilishqa teyyar. rusiyedinmu bu kishilerge insaniy muamile qilishini telep qilimiz. hörmetlik bash katipning bu toghridiki xizmetlirining ünümlük bolushini ümid qilimiz.»

u yüzminglarche ukrainaliqning mejburiy halda rusiyege ewetilgenlikini eskertip: «hörmetlik bash katipni ukraina puqralirining rusiyege ewetilishini toxtitish üchün tirishchanliq körsitishke chaqirdim» dédi.

u ukrainaning dunyadiki 400 milyon kishini bughday bilen teminleydighanliqini tekitlep, port sheherlirining rusiyening kontrolluqigha ötüshi sewebidin qolliridiki mehsulatlarni dunya bazarlirigha éksport qilalmighanliqlirini, buning kéyinki künlerde nurghun döletlerde yémek-chimek kirizisigha seweb bolushi mumkinlikini qeyt qildi.



مۇناسىۋەتلىك خەۋەرلەر