amérika bilen engliye ukrainagha qoral-yaragh yardemlirini köpeytti

türkiye awazi radiyosi xewiri: amérika dölet mudapie ministirliqi bayanatchisi jon kirbi washingtonda kündilik axbarat élan qilish yighinida, ukraina-rusiye urushi üstide toxtaldi.

u: «bérilgen yiraq musapiliq zembireklerning yérimidin köpi hazir ukrainada» dédi.

u ukraina armiyesige ewetilgen yiraq musapiliq zembirek sistémiliridin bashqa, 190 ming dane 155 millimétirliq zembirek oqliriningmu ukrainagha yetküzülgenlikini eskertti.

u ukraina armiyesige bériliwatqan telim-terbiye ishliri üstidimu toxtilip: «50 terbiyeligüchi yétishtürüsh shiliri bu hepte axirlashti. ular bashqilarni terbiyeleshni bashlaydu. hazir ikkinchi guruppining telim-terbiye ishliri üchün xizmet qiliwatimiz» dédi.

u rusiye tashqi ishlar ministiri sérgéy lawrowning yadro qorali ishlitish toghrisida éytqan sözlirige munasiwetlik bir soalgha jawab bergende, yadro qorali ishlitish mumkinchilikini otturigha tashlashning mesuliyetsizlik ikenlikini tekitlidi.

u mundaq dédi:

«héchkim bu urushning hazirqi halitidin téximu ulghiyishini xalimaydu. her qandaq kishi bu urushni yadro sahesige sörep kirmesliki kérek.»

engliye tashqi ishlar weziri liz trusmu paytext londonda ötküzülgen axbarat élan qilish yighinida, ukrainada rusiyening hujumlirigha qarshi téz sürette téximu köp qoral-yaragh ewetish kéreklikini bildürdi.

u: «ukrainaning teqdiri xeter astida. rusiye muweppeqiyetke érishse, yawropada téximu qorqunchliq aqiwetlerni peyda qilidu. bu sewebtin, teyyar turushimiz, ukrainagha qiliwatqan yardemlirimizni ikki hesse köpeytishimiz we ittipaqlishishimiz kérek» dédi.

u ukrainaning nato ölchemlirige layiq qorallar bilen qorallinishini kapaletke ige qilish üchün, polsha bilen ortaq komitét qurush ishlirini muzakire qiliwatqanliqlirini bildürdi.