بايدىننىڭ پىرېزىدېنتلىققا قايتا نامزات بولىدىغانلىقى ئىلگىرى سۈرۈلدى

تۈركىيە ئاۋازى رادىيوسى خەۋىرى: «The Hill» گېزىتىنىڭ بۇ تېمىغا يېقىن مەنبەلەرنى ئاساس قىلغان خەۋىرىگە قارىغاندا، بايدىن ئوباما بىلەن ئۆزىنىڭ 2024-يىلىدىكى پىرېزىدېنتلىق سايلىمى ھەققىدىكى پىلانىنى ئورتاقلاشقان.

بايدىننىڭ 2024-يىلى ئىككىنچى قېتىم پىرېزىدېنتلىق سايلىمىغا قاتنىشىدىغانلىقىنى ئېيتقانلىقىنى بىلدۈرگەن مەنبەلەر، «جو بايدىن يەنە بىر قېتىم كاندىدات بولۇشنى ۋە ھەممە ئادەمنىڭ بۇنىڭدىن خەۋەردار بولۇشىنى خالايدۇ» دېگەن.

ئامېرىكانىڭ سابىق پىرېزىدېنتى دونالد ترامپنىڭمۇ 2024-يىلىدىكى سايلامدا كاندىدات بولۇشقا تەييارلىق قىلىۋاتقانلىقىنى بىلدۈرگەن مەنبەلەر، ئاۋامنىڭ قوللاش نىسبىتى تۆۋەن بولسىمۇ، بايدىننىڭ يەنىلا ترامپنى مەغلۇپ قىلالايدىغان ئەڭ كۈچلۈك دېموكراتىك قانات نامزات ئىكەنلىكىنى ئىلگىرى سۈرگەن.

ئوباما 4-ئاينىڭ 5-كۈنى ئاقسارايدا ئۆتكۈزۈلگەن بىر پائالىيەتكە قاتناشقان ۋە بايدىن بىلەن چۈشلۈك تاماق يېگەنىدى.