җо байдин виладимир путинниң украинада «ирқий қирғинчилиқ» қилғанлиқини ейтти

түркийә авази радийоси хәвири: җо байдин иова иштатида йеқинқи 41 йилдин буйанқи әң йуқири пәллигә чиққан йеқилғу баһасиниң өрлиши вә пул пахаллиқи тоғрисида сөз қилди.

баһаниң өсүшиниң пуқраларға болған тәсирини азайтиш үчүн қолидин келишичә тиришиватқанлиқини тилға алған байдин: «украина ишғалийитиниң дунйаниң һәрқайси җайлирида йеқилғу вә йемәклик баһасини өстүривитишиниң тәсиригә учридуқ. дунйа бойичә әң чоң ашлиқ ишләпчиқарғучи болған хитай, русийә вә украина илгирикигә охшаш мәһсулат ишләпчиқармайватиду. шуңлашқа һәммә нәрсиниң баһаси өсүватиду. биз буни көрдуқ. бүгүн елан қилинған пул пахаллиқиниң 70 пирсәнти йеқилғу вә йемәклик баһасидин келип чиққан» деди.

байдин бу тәсирни азайтиш үчүн парламент билән бирликтә тиришчанлиқ көрситиватқанлиқини тәкитләп, пул пахаллиқиға қарита «русийә пирезиденти виладимир путинниң баһа өстүриши» деди.

җо байдин дунйаниң һәр қайси җайлирида вә америкида йеқилғу баһасини төвәнлитиш үчүн һәр күни истратегийилик нефит записидин базарға 1 милйон варил нефит селиватқанлиқини һәмдә  башқа дөләтләрниңму буниңға охшаш тәдбирләрни ишлитиватқанлиқини әскәртип, «аилиңизниң хамчоти, аптомобилиңизниң май бекини толдуруш күчиңиз, дунйаниң у четидики бир диктаторниң (путинниң) (украинаға) уруш елан қилип, ирқий қирғинчилиқ қилишиға бағлиқ болмаслиқи лазим» деди.

җо байдин бу сөзләр билән русийәниң украинадики қилмишлириға қарита тунҗи қетим «ирқий қирғинчилиқ» дегән сөзни ишләткән болди.

русийә қисимлири 24-февралда украинаға һуҗум башлиған иди.