украинада уруш районлиридин 3 миң 800 кишиниң тарқақлаштурулғанлиқи билдүрүлди

түркийә авази радийоси хәвири: украина муавин баш министири ирина верешчук твиттерда тарқатқан видеода, украинада уруш болуватқан районлардин пуқраларни тарқақлаштуруш ишлири тоғрисида мәлумат елан қилди.

у тарқақлаштуруш ишлириниң давамлишиватқанлиқини әскәртип: «түнүгүн (5-апрел) 3 миң 846 киши тарқақлаштурулди. 2 миң 216 киши өзлириниң аптомобиллири билән марийупол-бердйанск инсаний каридорлири арқилиқ запорижваға йетип барди. буларниң 1496 нәпири марийупол шәһиридин барди. 720 киши полохи, василивка, бердйанск вә мелитопол шәһәрлиридин барди» деди.

у украинаниң лухансик районидики бәзи шәһәрләрдин миңдин артуқ кишиниң аптобуслар билән тарқақлаштурулғанлиқини билдүрди.

у русийә армийәсиниң украинадики һәрикәтлири тоғрисида тохтилип: «дәсләпки мәлуматларға асасланғанда, украинада әң аз дегәндә 26 миң квадрат метир туралғу җай, 196 сақлиқ сақлаш оргини, 300 балилар бағчиси, сәккиз айродурум, 10 һәрбий айродурум, 129 фабрика вә ширкәт, 22 миң километирдин артуқ йол, 226 көврүк вә асма көврүк бузғунчилиққа учриди йаки вәйран қилинди» деди.

у уруш сәвәбидин украинаниң тарқан иқтисадий зийанлириниң тәкшүрүлүватқанлиқини билдүрүп: «бу рәқәм 68 милйард доллар. украина иқтисадий тартқан вастилиқ зийан 600 милйард доллар. наһайити әпсуски бу рәқәм һәр күни ешиватиду» деди.

у ахирида, русийәниң бу зийанларни төлиши керәкликини тәкитлиди.

бу җәрйанда, украина баш тәптиш мәһкимиси байанат елан қилип, русийә армийәсиниң бомбардиманлирида 927 мәктәпниң бузғунчилиққа учриғанлиқини, буларниң ичидә 83 иниң пүтүнләй вәйран болғанлиқини уқтурди.

байанатта, русийә уруш башлиған 24-февралдин (2022) бүгүнгичә 167 кичик балиниң җенидин айрилип, 279 кичик балиниң йариланғанлиқи қәйт қилинди.