lawrow bucha qirghinchiliqini yene ret qildi

rusiye tashqi ishlar ministiri sérgéy lawrow ukrainaning bucha shehiride puqralarning öltürülgenlikige dair fotograf we widéolarning «oydurulghan» ikenlikini bildürdi.

1808335
lawrow bucha qirghinchiliqini yene ret qildi

türkiye awazi radiyosi xewiri: rusiye tashqi ishlar ministiri sérgéy lawrow ukrainaning bucha shehiride puqralarning öltürülgenlikige dair fotograf we widéolarning «oydurulghan» ikenlikini eskertip, buning rusiye bilen ukraina heyetliri otturisida dawamlishiwatqan muzakirelerning buzulushi üchün qilinghanliqini éytti.

rusiye tashqi ishlar ministiri sérgéy lawrow tarqatqan widéosida, rusiye armiyesi chékingen bucha shehiride «ukraina armiyesi bilen istixbarat idarisi süretke alghan widéolarning qipqizil yalghan we oydurulghan ikenliki» ni bildürdi.

u «rastliqini ispatlash mumkin bolmighan bu ochuqtin ochuq xata ighwagerchilik» ning sewebi barliqini eskertip: «buni dawamlishiwatqan muzakirelerni buzush üchün bahane tépish arzusi dep oylishiwatimiz» dédi.

u rusiye bilen ukraina heyetliri otturisida istanbulda ötküzülgen muzakirelerde az bolsimu ümid peyda bolghan mushundaq bir waqitta, bucha körünüshlirining otturigha chiqqanliqini alahide tekitlep: «29-mart (2022) istanbulda ötküzülgen heyetler otturisidiki uchrishishlarda, ukraina terep tunji qétim ukrainaning salahiyiti we bixeterlik kapaletlirige munasiwetlik kélishimning qandaq bolushi kérekliki toghrisida yazma tesewwurini teklip qilghan idi» dédi.

u rusiye terepning ukraina bilen istanbulda ötküzülgen uchrishishlargha uyghun halda xalisliq bilen urush sépidiki jiddiychilikni peseytishni qarar qilghanliqini xatirilitip, bu sewebtin rusiye eskerliri buchadin chékinip aridin üch kün ötkendin kéyin, yuqirida tilgha élinghan körünüshlerning otturigha chiqqanliqini qeyt qildi.

u mundaq dédi:

«buning diqqetni muzakire musapisidin burash, ukraina terepning istanbuldiki muzakirelerdin kéyin qayta bashlinish nuqtisigha qaytishi, yéngi shertlerning otturigha qoyulushi üchün qilinghanliqigha ishinish üchün nurghun seweblirimiz bar. gherb taratquliri bucha shehiri heqqidiki saxta melumatlarni tarqatqan waqitta, ukraina heyiti muzakire musapisini pütünley üzüp tashlashqa urundi.»

u xelqaraliq jemiyetning rusiyening semimiy we izchil halda muzakire ötküzüshke teyyar ikenlikini bilishi kéreklikini tekitlep: «biz kiyéwgha buzghunchiliq qilmasliq toghrisida éniq signal bérishte ching turimiz. bolmisa, minsik kélishimi teqdirining tekrarlinish xewpi bar, biz buninggha hergiz qoshulmaymiz» dédi.



مۇناسىۋەتلىك خەۋەرلەر