nato: xitayni rusiyening ukrainagha qaratqan urushigha yardem bermeslikke chaqirimiz

türkiye awazi radiyosi xewiri: shimaliy atlantik ehdi teshkilatigha eza döletlerning rehberliri, rusiyening ukrainagha 24 – féwral küni tajawuz qilishidin kéyin otturigha chiqqan özgirishler heqqide muzakire élip bérish üchün, bélgiyening paytexti biryusséldiki nato qarargahida bir yerge jem boldi.

türkiyege wakaliten jumhur reis rejep tayyip erdoghan ishtirak qilghan bashliqlar yighinidin kéyin élan qilinghan ortaq bayanatta, ukrainagha urush qozghighan rusiye qattiq eyiblendi.

shimaliy atlantik ehdi teshkilatigha eza döletlerning her bir santimétir zéminining qoghdilidighanliqi we mudapie qilinidighanliqi eskertilgen bayanatta, «xitayni rusiyening ukrainagha qarita urushigha herqandaq shekilde yardem bérishtin yiraq turushqa chaqirimiz» déyildi.

shimaliy atlantik ehdi teshkilati bash katipi stolténbérgmu, bashliqlar yighinidin kéyin ötküzgen axbarat élan qilish yighinida, mundaq dédi: «shimaliy atlantik ehdi teshkilatigha eza döletlerning rehberliri ukrainani téximu köp qollash mesiliside pütüshti. biz ukrainagha biyologiyelik, ximiyelik, radiyologiyelik we yadro tehditliridin  qoghdash üchün tor bixeterliki we üsküniler yardimi bérishni qarar qilduq. ximiyelik qorallarning herqandaq shekilde ishlitilishi toqunushning mahiyitini pütünley özgertiwétidu. xitay rusiyening tajawuzchiliqigha iqtisadiy yaki herbiy jehettin yardem bermesliki kérek. biz toqunushning yawropadiki bir urushqa, shimaliy atlantik ehdi teshkilati bilen rusiye otturisidiki urushqa aylinip kétishining aldini élishimiz lazim.»

yene bir tereptin, jumhur reis rejep tayyip erdoghan, shimaliy atlantik ehdi teshkilatining dölet we hökümet bashliqliri pewquladde yighini dairiside, nato qarargahida engiliye bash weziri boris jonson bilen bir yerge jem boldi.

erdoghan, italiye bash ministiri mariyo draghi we éstoniye bash ministiri kaja kallas bilen ayrim - ayrim halda körüshkenidi.

jumhur reis erdoghan, shimaliy atlantik ehdi teshkilatining dölet we hökümet bashliqliri pewquladde yighini harpisida, firansiye pirézidénti émmanuél makron bilen bir yerge jem bolghanidi.

bu ariliqta, (firansiye pirézidént mehkimisi) élisé sariyi teripidin élan qilinghan yazma bayanatta, jumhur reis erdoghan bilen pirézidént makronning nato qarargahida bir yerge jem bolup, rusiye – ukraina urushi dawamlishiwatqan bir peytte, ikki ittipaqdash dölet otturisidiki zich hemkarliqni izchil dawamlashturush mesiliside birdeklik hasil qilghanliqi eskertilish bilen bir waqitta, uchrishishta, ikki rehberning, jenubiy kawkaz rayonining weziyiti toghriliqmu muzakire élip barghanliqi, makronning, türkiye – erméniye otturisidiki munasiwetlerning normallishishi mesiliside körsitiliwatqan tirishchanliqtin intayin xursen ikenlikini otturigha qoyghanliqi tekitlendi.