nato bashliqlar yighini bashlandi

türkiye awazi radiyosi xewiri: türkiyege jumhur reis rejep tayyip erdoghan wekillik qiliwatqan nato bashliqlar yighinigha, ittipaqdash döletlerning rehberliri ishtirak qilmaqta.

yighin harpisida xatire süretke chüshken rehberlerning küntertipini rusiyening ukrainagha tajawuz qilishidin kéyinki özgirishler teshkil qilidu.

shimaliy atlantik ehdi teshkilatining sherqiy yawropadiki uzaq mezgillik wezipe ötüshi heqqide muzakire élip bérilidighan yighin dairiside, dölet we hökümet bashliqliri tünügün kechtin buyan biryussélda ikki tereplik uchrishishlarda bolushqa bashlighanidi. yighindin kéyinmu bezi rehberlerning nato qarargahida ikki tereplik uchrishishlirini dawamlashturushi mölcherlenmekte.

nato bashliqlar yighini harpisida firansiye pirézidénti émmanuél makron bilen bir yerge jem bolghan jumhur reis rejep tayyip erdoghanmu qoyuq ikki tereplik uchrishishlarda bolmaqta.

shimaliy atlantik ehdi teshkilati bash katipi stolténbérg, tünügün élan qilghan bayanatida, «ete chaqirilidighan bashliqlar yighinida téximu köp qararlarni chiqirimiz, xewpke taqabil turush qurulmimizni qayta tengshep chiqishimiz kérek» dégenidi, hemde shimaliy atlantik ehdi teshkilatining sherqiy qanitidiki küchlerning sanini quruqluq, hawa we déngizda köpeytidighanliqlirini, deslepki qedemde bulghariye, wéngiriye, ruminiye we silowakiyege téximu köp esker orunlashturulidighanliqini bildürgenidi.