әрдоған тәрәпләрни хәлқаралиқ қанунға риайә қилишқа чақирди

түркийә авази радийоси хәвири: җумһур рәис рәҗәп таййип әрдоған конго демократик җумһурийитидин сенегалға қарап йолға чиққанда, айропиланда мухбирларниң соаллириға җаваб бәрди.

у түркийәниң русийә-украина киризисида әң баштин тартип җиддийчиликни пәсәйтиш үчүн сәмимий шәкилдә ғәйрәт қилғанлиқини билдүрди.

у: «киризисни һәл қилиш чарә-тәдбирлиримизни ениқ оттуриға қойдуқ. йеңи вәзийәтниң оттуриға чиқиши нәтиҗисидә ташқи ишлар министирлиқимиз елан қилған байанатта, русийәниң донетск билән луханскни намда етирап қилишниң, минск келишимигә хилап икәнлики тәкитләнди. бу қарарниң украинаниң сийасий бирлики, игилик һоқуқи вә земин пүтүнлүкигә очуқ хилап икәнлики әскәртилди» деди.

у мундақ деди:

«донетск билән луханскни етирап қилиш қарарини қобул қилғили болмайду дәп қараймиз. тәрәпләрни салмақ болушқа вә хәлқаралиқ қанунға риайә қилишқа чақиримиз. қарадеңиз дөлити болуш сүпитимиз билән, нурғунлиған чарә-тәдбир пиланлириниң түзүлүши шәрт. әлвәттә биз тәдбирлиримизни еливатимиз.»

у украина пирезиденти владимир зеленскийниң б д т хәвпсизлик кеңиши, түркийә вә германийәниң бирләшмә йиғин ечиш тәклипи үстидә тохталғанда: «б д т хәвпсизлик кеңиши йаки башқа дөләтләр қобул қилса, бу йиғинда өзимизниң орнини алимиз» деди.