putin rusiyening donétsk bilen luxanskning musteqilliqini qollaydighanliqini jakarlidi
rusiye pirézidénti wladimir putin: «rusiye parlaménti donétsk we luxanskning musteqilliqini qollaydu. ukrainaning sherqidiki donbas tarixiy jehettin rusiyening bir parchisidur» dep bayanat qildi.
türkiye awazi radiyosi xewiri: rusiye pirézidénti wladimir putin 21-féwral kechte xelqqe xitab qilip nutuq sözlidi.
u ukrainaning sherqining rus zémini ikenlikini bildürüp, tarixiy jehettin rus impératorluqining bir parchisi bolghan jaylarni bashqilargha bériwitishke mejbur bolghanliqini eskertti.
u: «ötmüshni özgertish mumkin emes, emma heqiqetni sözlesh kérek. hazirqi ukraina rusiye teripidin quruldi. ukrainani sirtqi küchler bashquruwatidu, muhim qararlarni gherblikler bériwatidu, xelq ékspilatatsiye qiliniwatidu» dédi.
u ukrainaning özliri üchün éytqanda peqet qoshnila emes, belki rusiye tarixining bir parchisi ikenlikini, ukrainaliqlarning bolsa yoldashliri we uruq-tughqanliri ikenlikini qeyt qildi.
u yene, «donbastiki hujum» ning axirlishishi kéreklikini, undaq bolmighanda, mesuliyetning ukrainada bolidighanliqini sözlirige ilawe qildi.
u mundaq dédi:
«gherb bilen muzakire ötküzüshke teyyarmiz. emma, teleplirimiz orunlinishi kérek.»
u xelqqe xitab qilip sözligen nutuqidin kéyin, ukrainaning sherqidiki rusiyeperestlerning namdiki hökümetlirini étirap qilishqa munasiwetlik qararnamelerni imzalap, testiqlinishi üchün parlaméntqa ewetti.
her biri besh maddiliq qararnamelerde, putinning rusiye armiye qisimlirigha, donétsk we luxansk xelq jumhuriyetliride tinchliqni qoghdash üchün heriket qilish permanini chüshürgenliki tekitlendi.
putin yene, rusiye tashqi ishlar ministirliqighimu namda donétsk we luxansk bilen diplomatik munasiwetlirining ornitilishi üchün kélishim tüzüsh permanini chüshürdi.
mezkur qararnamelerning imzalanghan kündin bashlap ijra qilinidighanliqi qeyt qilindi.
