miyunxén xewpsizlik konféransi bügün bashlinidu

dunyadiki muhim munberlerdin biri bolghan miyunxén xewpsizlik konféransi (MSC 2022) bügün (2022-yili 18-féwral) bashlinidu.

1780939
miyunxén xewpsizlik konféransi bügün bashlinidu

türkiye awazi radiyosi xewiri: 2022-yilliq miyunxén xewpsizlik konféransi bügün bashlinidu.

wuxen wirusi (Kovid-19) tedbirliri sewebidin, 2022-yilliq miyunxén xewpsizlik konféransi ishtirakchilirining sani köp azaytilidu. konférans ramkisidiki nurghun paalyetler intérnéttin tarqitilidu.

konféransta, ukraina kirizisi, kilimat kirizisliri, téxnologiyeni qaytidin tertipke sélish we wabagha qarshi küresh, yawropa ittipaqida we dunya iqtisadida yüz bergen sinaqlar qatarliq mesililer muzakire qilinidu.

bu yil konféransning 58-nöwetliki ötküzülidu we 20-féwralghiche ötküzülidu. konférans her yildikige oxshash gérmaniyening miyunxén shehiridiki bayghishe xof (Bayerischer Hof) méhmansariyida ötküzülidu.

siyaset, iqtisad, herbiy we istixbarat sahelirining eng yuqiri derijilik wekillirini özara uchrashturidighan bu yilqi konféransqa, 30 din artuq dölet we hökümet bashliqliri, texminen 100 döletning tashqi ishlar ministirliri we dölet mudapie ministirlirining ishtirak qilishi kütülmekte.

dunyawi sewiyede paaliyet qiliwatqan shirketlerning yuqiri derijilik bashqurghuchiliri, akadémiklar we ijtimaiy teshkilatlarning wekillirini öz ichige alghan 300 din artuq méhmanmu konféransning ishtirakchiliri arisidin orun alidu.

konféransta yene, dunyaning oxshimighan jayliridiki kirizislar, mudapie we tashqi siyaset mesililirimu muzakire qilinidu.

2022-yilliq miyunxén xewpsizlik konféransining küntertipini, ukraina kirizisi, waba, kilimat kiizisliri, yawropa ittipaqining özini özi qoghdishi, démokratiyening qoghdilishi, téxnologiyening tertipke sélinishi, sherqiy yawropada ulghiyiwatqan jiddiychilikler we dunyada eng shiddetlik toqunushlar yüz bériwatqan rayonlarning nöwettiki weziyiti qatarliq témilar teshkil qilidu.

kélechekke munasiwetlik xewplerni közdin kechürüsh, afghanistandin amérika we natoning chékinishi, malidiki kirizis, besre qoltuqida dawamlishiwatqan muqimsizliq, barghanséri éshiwatqan dunyawi adaletsizlik, téxnologiye séktoridiki teminlesh zenjirining buzulushi qatarliq témilarmu, bu qétimqi konféransta muzakire qilinidu.

konféransqa yene, muhim ijtimaiy teshkilatlar we tetqiqat organlirining bashliqliri, az sanda akadémik, axbarat we soda-sanaet dunyasining aldinqi qatardiki rehberlirimu teklip qilindi.

rehberler yéqindin köngül bölüwatqan üch künlük konféransning échilish murasimi, b d t bash katipi antoniyo gutérsning söz qilishi bilen bashlinidu.

gérmaniye tashqi ishlar ministiri analéna baérbok (AnnalenaBaerbock) ning konférans ramkisida teshebbus qilishi bilen, G7 dölet guruhining tashqi ishlar ministirliri ukraina kirizisini muzakire qilish üchün özara jem bolidu.

gérmaniye, firansiye we ukraina tashqi ishlar ministirlirimu konférans ramkisida özara körüshidu.

amérika muawin pirézidénti kaméla xarris, gérmaniye bash ministiri olaf sholz, ukraina pirézidénti wladimir zéléniskiy, türkiye dölet muadpie ministiri hulusi akar, nato bash katipi stolténbérg, yawropa ittipaqi komitétining bashliqi ursula fondér léyén qatarliq rehberler konféransqa ishtirak qilidu.

rusiye bu yilliq miyunxén xewpsizlik konféransigha qatnashmaydu. bu rusiyening 1999-yildin buyan tunji qétim konféransqa qatnashmasliqi bolup hésablinidu.



مۇناسىۋەتلىك خەۋەرلەر