мийунхен хәвпсизлик конферанси бүгүн башлиниду

түркийә авази радийоси хәвири: 2022-йиллиқ мийунхен хәвпсизлик конферанси бүгүн башлиниду.

вухән вируси (Kovid-19) тәдбирлири сәвәбидин, 2022-йиллиқ мийунхен хәвпсизлик конферанси иштиракчилириниң сани көп азайтилиду. конферанс рамкисидики нурғун паалйәтләр интернеттин тарқитилиду.

конферанста, украина киризиси, килимат киризислири, технологийәни қайтидин тәртипкә селиш вә вабаға қарши күрәш, йавропа иттипақида вә дунйа иқтисадида йүз бәргән синақлар қатарлиқ мәсилиләр музакирә қилиниду.

бу йил конферансниң 58-нөвәтлики өткүзүлиду вә 20-февралғичә өткүзүлиду. конферанс һәр йилдикигә охшаш германийәниң мийунхен шәһиридики байғишә хоф (Bayerischer Hof) меһмансарийида өткүзүлиду.

сийасәт, иқтисад, һәрбий вә истихбарат саһәлириниң әң йуқири дәриҗилик вәкиллирини өзара учраштуридиған бу йилқи конферансқа, 30 дин артуқ дөләт вә һөкүмәт башлиқлири, тәхминән 100 дөләтниң ташқи ишлар министирлири вә дөләт мудапиә министирлириниң иштирак қилиши күтүлмәктә.

дунйави сәвийәдә паалийәт қиливатқан ширкәтләрниң йуқири дәриҗилик башқурғучилири, академиклар вә иҗтимаий тәшкилатларниң вәкиллирини өз ичигә алған 300 дин артуқ меһманму конферансниң иштиракчилири арисидин орун алиду.

конферанста йәнә, дунйаниң охшимиған җайлиридики киризислар, мудапиә вә ташқи сийасәт мәсилилириму музакирә қилиниду.

2022-йиллиқ мийунхен хәвпсизлик конферансиниң күнтәртипини, украина киризиси, ваба, килимат киизислири, йавропа иттипақиниң өзини өзи қоғдиши, демократийәниң қоғдилиши, технологийәниң тәртипкә селиниши, шәрқий йавропада улғийиватқан җиддийчиликләр вә дунйада әң шиддәтлик тоқунушлар йүз бериватқан районларниң нөвәттики вәзийити қатарлиқ темилар тәшкил қилиду.

келәчәккә мунасивәтлик хәвпләрни көздин кәчүрүш, афғанистандин америка вә натониң чекиниши, малидики киризис, бәсрә қолтуқида давамлишиватқан муқимсизлиқ, барғансери ешиватқан дунйави адаләтсизлик, технологийә секторидики тәминләш зәнҗириниң бузулуши қатарлиқ темиларму, бу қетимқи конферанста музакирә қилиниду.

конферансқа йәнә, муһим иҗтимаий тәшкилатлар вә тәтқиқат органлириниң башлиқлири, аз санда академик, ахбарат вә сода-санаәт дунйасиниң алдинқи қатардики рәһбәрлириму тәклип қилинди.

рәһбәрләр йеқиндин көңүл бөлүватқан үч күнлүк конферансниң ечилиш мурасими, б д т баш катипи антонийо гутерсниң сөз қилиши билән башлиниду.

германийә ташқи ишлар министири аналена баербок (AnnalenaBaerbock) ниң конферанс рамкисида тәшәббус қилиши билән, G7 дөләт гуруһиниң ташқи ишлар министирлири украина киризисини музакирә қилиш үчүн өзара җәм болиду.

германийә, фирансийә вә украина ташқи ишлар министирлириму конферанс рамкисида өзара көрүшиду.

америка муавин пирезиденти камела харрис, германийә баш министири олаф шолз, украина пирезиденти владимир зелениский, түркийә дөләт муадпиә министири һулуси акар, нато баш катипи столтенберг, йавропа иттипақи комитетиниң башлиқи урсула фондер лейен қатарлиқ рәһбәрләр конферансқа иштирак қилиду.

русийә бу йиллиқ мийунхен хәвпсизлик конферансиға қатнашмайду. бу русийәниң 1999-йилдин буйан тунҗи қетим конферансқа қатнашмаслиқи болуп һесаблиниду.